Vawiin khan Additional District & Sessions Judge Court  chu Gauahati High Court Chief Justice Hon’ble  Mr. Justice Ajit Singh leh Law & Judicial Minister Pu Lalsawta  ten an hawng.

Hawnna inkhawmah hian Hon’ble Mr. Justice Ajit Singh chuan thu sawiin Champhai chu kawng hrang hranga District pawimawh tak anih thu a sawi a. Insumdawn tawnna hmun a nih avangin  ruihhlo tawhlrukna leh sualna hrang hrang a punlun zel nia a lan thu a tarlang a. Dan leh thupek kenkawh kawngah awlsawm zawka Court rorelna neih anih theihna turin Additional District & Sessions Judge Court chu Champhaiah ruhman a nih thu a sawi a ni. A hlawhtlinna tura tha leh zung sengtu Mizoram Sawrkar, Judicial Department leh Champhai mipui leh tlawmngai pawlte hnenah lawmthu a sawi a. Chief justice chuan Gauhati High Court in he Courta thu turin Pu R. Vanlalvena, Addl District & Sessions Judge chu a ruatfel tawh thu a tarlang bawk a ni.

Law & Judicial Minister pawhin  thu sawiin Sessions Judge Court chu Judiciary leh Executive thuneihna tangdun rahchhuah a nih thu a tarlang a. He Court nei thei tura Champhai leh Zote mipuite inpekna chu fakawm tiin an hmalakna leh inpekna chu Court nei thei tura hlawhtlinna rahbi pawimawh a nih thu a sawi bawk. Court chu misual hremna lam chauh ni lovin dikna hailan bakah sual a tlem theihna tura Rorelna in pawimawh tak a nih thu a sawi a Champhai District in tangkai taka a hman ngei a beisei thu a sawi bawk a ni.He hunah hian hleilenna leh sualna tuartu mi 10 hnenah zangnadawmna pek nghal an ni .

Additional District & Sessions Judge Court hi Mizoram Sawrkar in cheng Nuai 33.21 senga IIDC Complex Zote ah Building 4 dingsa cheithaa a siam a ni a. Hawnna inkhawmah hian Pu Michael Zothankhuma, Judge Gauhati High Court, Gauhati High Court, Aizawl Bench Registrar, Aizawl District Court a District & Sessions Judge te bakah Law & Judicial Department Officer te leh Champhai District a Sawrkar Official hrang hrangte leh MJA leh khawtlang hruatute an tel a ni.