Mizoram State Addl. CEO Pi Lalzarmawii, IAS hovin vawiin khan NLUP Conference Hall, Aizawl-ah District hrang hranga Election kaihhnawih official-te kokhawmin ‘State Level Workshop and Sensitization on Accessible Elections for persons with Disabilities’ neih a ni a. He Workshop-ah hian Election Commission of India-in pianphunga rualbanlote tana awlsam zawka vote an thlak theihna tura ruahmanna hrang hrang a rawn siam tharte sawiho a ni.
State Level Workshop hawngtu Pi Lalzarmawii, Addl. CEO chuan India chu democracy a nih angin mipui aiawh tur thlannaah khua leh tui kum 18 chin chunglam, pianphunga rualbanlote leh kawng danga vanduaite pawh, vote thlak vek tura beisei an ni tih a sawi a. Vanduaina hi tu chungah pawh thleng thei a ni tih hre renga rualbanlote chungah ngilneihna leh hriatthiamna lantir hi kan tih tur dik tak a ni, a ti. Tun dinhmunah Mizoram chhungah electoral roll-ah pianphunga rualbanlo inziak lut (enrol) zat chu mi 3915 an ni a, heng zingah mitdel/mit lam tha lo-303, beng ngawng/beng lama harsatna nei-1318, zeng/chetlam harsat-738 leh rualbanlohna chi dang nei-1556 an ni tih a tarlang. Kumin Inthlan thupuiah - ‘Accessible Elections - No Voter to be left behind’ tih a nih ang takin electoral roll-a awm zawng zawngte chuan vote an thlak theuh hi ram khua leh tui thate mawhphurhna leh chanvo dik tak a ni, a ti.
State Level Workshop kaihruaitu Pu H.Lianzela, Dy. CEO chuan India chu ‘welfare state’ puitling a nih theih nan mipui rorelna ram a nih a ngai a, chuvangin inthlanna felfai leh langtlang neih hi a pawimawh hle a ni, a ti. Inthlanah hian pianphunga rualbanlote chungchangah kum tam sorkar leh mipuite pawh an lo mutthlu a, tunah erawh chuan anmahni ngai pawimawhna leh awlsam zawka vote an thlak theihna turin ruahmanna hrang hrang siam zel a ni tih a sawi a. Sorkar lamah Election kaihhawih officials leh security kengkawhtu police-te leh candidate/political parties leh voter-te inkarah indaidanna awm lova, inhrethiam tak leh hawihawm taka he inthlanah mahni chanvo theuh ti turin a chah.
Vawiina Workshop neihah hian Resource Persons 2 - Pu Malsawmzuala, Asst. CEO leh Pi Chuauzikpuii, Asst. Director, SWD & Nodal Officer, PwDs ten an zirtir a ni.
