Vawiin khan NIC Conference Hall, Champhaiah kumin inthlanna tur inpuahchahna kalzelah District chhunga RO, ARO District Control Room & Call Centre thawktute leh Personal Assistant-te pualin Information Technology Application zirhona  neih a ni.

Training-ah hian khua leh tuiten election kaihhnawih thil Model Code of Conduct palzutna an hriatte a rang thei ang bera District Election Office lama an thlen theihna tur cVIGIL  Apps (Citizen Vigilance Apps) chungchang leh hnathawh dante Pu K.Lalngaihzuala, DIO, Champhai kaihhruainain zirho a ni a.  cVIGIL apps hi Android application niin Play Store atanga download theihin a awm a, Apps hmang hian video leh thlalak thawptu thil telin complain engtik lai pawha thehluh theih a ni a. Complain lut reng rengte chu DEO Office-a District Control Centre-ah a lut anga, hemi hnu hian District Election Officer (DEO)  remruatnain bialtu Flying Squad-ten a rang thei ang berin a hmunah kalchilhin an enfiah anga, report bialtu Returning Officer hnenah an thehlut anga, a tul angin DEO-in action a la thin dawn a ni.

He hunah hian Pi Rebecca Laldinmawii Hrahsel, ARO, Champhai North Assembly Constituency-in Service Voters mahni Constituency pawna awmten Electronic kaltlang Postal Ballot hmanga vote an thlakna tur ‘Electronically Transmitted Postal Ballot System (ETPBS) chungchang leh buatsaih dan tur a sawifiah a. Final Electoral Roll 2018 September Ni 28 a tlangzarh tak tarlan danin Champhai District chhungah Service Voters 613 an awm a ni. Pu Lalremruata Kullai, Election Officer Champhaiin ‘Important Forms’ tih thupui hmangin Election kaihhnawih form pawimawh tak takte sawifiahna a nei bawk a ni.