2847/2023-2024

Aizawl, the 24th November, 2023: Vawiin chawhnu dar 1:00 khan Addl. CEO Pu H.Lianzela, Nodal Officer, Media Cell, CEO Office, Mizoram hovin General Election to the Mizoram Legislative Assembly, 2023 a vote tlate chhiar huna Media Centre kaltlanga mipui hnena result chak leh awmze nei zawka puanzar a nih theih nana hmalak dan tur chungchanga inrawnkhawmna chu ICT Conference Hall, Old Secretariat Building-I, Treasury Square-ah neih a ni.

Meeting kaihruaitu Addl. CEO Pu H.Lianzela chuan inthlang ram Democracy-a mipui aiawh thlan kawngah media-te an pawimawh thu sawiin, Media-te hmakhua ngaipawimawhin ECI pawhin an tan ruahmanna a siam thin thu a sawi a. Boruak muanawm tak hnuaiah vote thlak a nih ang bawkin harsatna awm lova vote chhiar a nih theih nan leh mipuite'n result an hriat zung zung theihna turin ruahmanna felfai tak neih a tul a ni, a ti a. Addl. CEO chuan General Observer bakah Counting Observer 40, AC tin tan pakhat zel ECI in a ruat thu a sawiin, Mizoramah Counting Centre 13 ah Counting Hall 40 a awm dawn thu a tarlang a. Counting Hall 40 tan EVM table 399 leh Postal Ballot table 56 ahte Counting personnel 4,000 chuangte'n zing dar 8:00 atangin vote an chhiar tan dawn thu a sawi a. Media chu mipui ngaihchan ber a nih dawn avangin hemi atana ruahmanna felfai tak lo nei lawk theuh turin a chah nghal bawk.

Thusawitu dang Dy. CEO Pu Henry C.Lalrawnkima, Member Secretary, Media Cell, CEO Office chuan inthlan result-te Encore Portal-ah dahluh zel a nih dawn thu leh results.eci.gov.in ah ngaihven theih a nih tur thu a sawi bawk.

He hunah hian DDK, AIR bakah Cable TV pahnih ZONET leh LPS aiawhte atangin chak leh awmze nei zawka inthlan result puanzar zung zung a nih theihna tura rawtna awmte bakah tawn hriat an neihte ngaihthlak a ni a. Meeting chuan DDK, AIR, ZONET leh LPS te inbunna tur bakah Interview Booth, Counting Centre tinah siam ni se a ti bawk.

He huna tarlan a nih danin Counting Centre tinah Media Centre a awm tur thu leh hemi atang hian information pek chhawn thin tur niin Media-te'n anmahni ruahmanna siam kaltlangin result an puangzar nghal zung zung thin dawn a ni. Media bikte tan ECI in Counting Centre-a luhphalna Authority Letter (AL) a siam sakte tan chauh luh phal a ni dawn a. Thuneitute ruahmanna siam ang zel chauha Counting Hall-a luh tur niin, thla la turte tan video long shoot chauh lak phal a ni ang. Mobile phone leh Dan phal loh bungraw dang kenluh phal a ni dawn lo a, Counting Hall luh dawnin Media Centre-ah mobile phone dah zel tur niin, Media Centre-ah hian mobile phone hman theih a ni ang.

District tin tan DEO theuhte ruahmanna angin Media Centre buatsaih a ni a, media mite tan he hmun hi information an lakna tur leh vote chhiar chhunga an innghahna tura ruahman a ni a, Information & Public Relations Officer-te’n an thutchilh reng dawn a ni.

He hunah hian Pi Saizikpuii, Addl. DC Aizawl, State Media Cell Member-te,  DDK, AIR, ZONET Cable TV leh LPS Cable TV aiawhte an tel a ni.