No.1636/2020-2021

Dated Serchhip, the 3rd June, 2020: Vawiin chawhnu dar 2:00 khan Serchhip khaw chhunga Village Level Task Force aiawhte chu Pu HD Lalpekmawia, Addl. DC hovin DC Meeting Room ah an thukhawm a, Lockdown kalpui meka hmalak dan turte an sawi ho.

Pu HD Lalpekmawia chuan, tun dinhmunah COVID 19 positive pung hluai palh thei kan nih avangin VLTF te kan inthlahdah a thiang lova. District Task Force lam atanga fuih thar reng nghak lovin, kan zaa kan him theih nana ding kan ni tih hriaa kan tan tlan a tul hle, a ti a. Lockdown thawh 5-na atana inkaihhruaina kan neih mek te anihna anga kalpuia, mipui ti chiai lo leh thudiklo vanga chiaina thleng thei laka zirtirtu leh kaihruaitu nih a pawimawh thu a sawi bawk. Sawrkarin inkaihhruaina a siamah mi 5 aia tam awm khawm phalloh tih te, mask vuah lova khawlai chhuah khap anih te leh social distancing maintain tura duty te a tul a, vantlang aurinna hmanga mipuite hriattur in hrilhhriat thar fo te pawh a tul a ni, tiin, mahni huam chhung theuha khauh taka kalpui turin a chah a ni.

Pu Denny Lalchhuanmawia, SDC pawhin thu sawiin, kan hlauh ber hi kan hriat chian a ngai a, fimkhur thiam a ngai a. Kan him tlan a, kan that tlan nan dan anga fir taka kal a ngai a. DC Office atangin Order a awm emaw awm lo emaw, VLTF ten hmalakna tur kan ngah a, dan hnuaia thuneihna kan neihte hriain, thlei bik nei lova hma kan lak thar a ngai a ni, tiin thahnem ngaih a tul thu a sawi ve bawk.

He hunah hian Serchhip chhunga VLTF hrang hrang aiawhte an kal tha hle a, an huam chhunga an hmalakna hrang hrangte sawiin, DC Office atanga hmalak sak an mamawhna lai te pawh sawi ho a ni.