No.1637/2020-2021

Vawiin chawhnu dar 3:30 khan khan Maharashtra a Mizoram mi leh sa tangkhangte phurtu bus zinga a hmasa berin Bairabi rel chawlhhmun a rawn thleng.

Mumbai atanga rawn chhuak Shramik train hi June ni 2, 2020 tlai a Bairabi rel chawlhhmun rawn thleng tur a beisei a nih laiin, Badarpur leh Lumding inkarah leiminin rel kawng a tihchhiat avangin Guwahati ah an chhuk a. Mizoram sawrkar leh Assam sawrkar indawr nghalin Assam sawrkar bus 68 hmangin nizan khan Guwahati an rawn chhuahsan a ni.
Bairabi ah hian Screening tih ni tawh lovin anmahni district theuh ah Bus a kal tir nghal zel tura ruahman a ni a, an district theuh a an awmna tur Quarantine Facility an thlen hunah RT-PCR test turin swab sample lak sak an ni dawn a ni. Tangkhang rawn haw te phur tur hian Mizoram sawrkar chuan bus 89 a ruahman a, an lo haw chhohna bus hmang hian Jharkhand a haw tur rel kawng chhiat vanga Bairabi-a tang zui ta mi 1365 an haw thla ve nghal ang.

Bairabi rel chawlhhmun ah hian Dr H Lalthlangliana, Deputy Commissioner Kolasib district leh tangkhangte lo dawnsawnna kawng a mawhphurhna hrang hrang nei ten an lo hmuak a. Bairabi rel chawlhhmun an rawn thlen veleh hian an inhnawhpuarna tur ei leh in pek an ni a, Meidumah zanriah pek leh an ni ang.

Maharashtra atanga tangkhang rawn haw tur in report hi mi 1597 an ni a, bus hnuhnung berin Bairabi a rawn thlen hun tur hi hriat theih a ni rih lova, Bairabi-ah hian rawn haw zat inchhiar nawn leh zel a ni.

Tangkhang phurhna bus te hi a khalhtute leh a chuangte inkalpawh loh nan indaidanna tha tak a siam vek a ni a. A tul dan a zirin Disinfection Team ten a chhung an tifai ziah thin a ni.