No.1638/2020-2021

Vawiin chawhnu dar 2 khan Deputy Chief Minister Pu Tawnluia hovin a pisa-ah Tuichang Bial leh Khawzawl District-a Telecom Service Providers- BSNL, Airtel, Reliance Jio leh Vodafone hotuten meeting an nei.

Pu Tawnluia chuan sawrkar hmalaknain District thar function tirte zingah Khawzawl District a tel thu leh hmasawnna atan model district nih an tum thu a sawi a, he hmalakna kal zelah hian Telecom Service chu a pawimawh ber te zing a mi a ni,a ti. Tun hnaiah Covid-19 hripui leng avanga Lockdown kalpui chhung pawhin sorkar, zirna In, sumdawnna leh mimal thlengin telecom service hian awlsamna nasa takin a siam a. Hripui dona kawngah pawh a tangkaiin inbiakpawh leh inthlunzawmna (network) chhiat leh thatin nghawng a nei thui hle, a ti. Sawrkar leh mimal company ten Work From Home tiin mahni in lamah hna an thawk a, zirna inte pawhin Online Class-te an kalpui bawk a, hripui avanga khawsak phung danglam mek karah telecom service provider-te nen ram hmasawn nan ke an pen ho a ni, Deputy Chief Minister chuan a ti.

Deputy Chief Minister Pu Tawnluia chuan Telecom Service Provider te chu an hmalak tawhna ah lawmthu a hrilh a, mipui rawngbawltu an nih tlanna ah tun aia service tha zawk Khawzawl District mipui ten an neih theih nan theihtawp chhuah turin a fuih a. Puih an ngaihna apiangah puih a in huam thu a hrilh bawk.

Telecom Service Provider-te hian a mal malin an harsatna tawh te an sawi a, sorkar puih an mamawhna te, hma an sawn theihna tur kawng nia an hriatte sawiin an hmalak mekna report an pe a.Power Supply lama harsatna an tawh dan te, development hnathawh avanga fibre chat thin te leh thil dang dang vanga an service duh anga a kal loh thin thu te an sawi a. Sorkar nen awmze nei zawka thawh ho an duh thu te an sawi bawk a ni.