2344/2023-2024

Lawngtlai dated 17th October 2023: Vawiin chawhnu khan Mizoram chhung a puan tah leh Mizo puan atanga thuam hrang hrang phochhuahna hun, ZOHANDCO leh Development Commissioner (Handlooms), Ministry of Textiles, Govt. of India tangkawp buatsaih ‘State Handloom Expo’ chu Pu Abraham Beirazi Khithie, Addl. Deputy Commissioner chuan khuallian niin a hawng a. Ni 29, October 2023 thleng awh tur ‘State Handloom Expo’ hawnna hun hi Pu C.Lalrinmawia, Manager, ZOHANDCO-in kaihruaiin Pu C.Lalrammawia, Chairman, ZOHANDCO leh Pu Goerge B.Zoramliana, Member, Board of Director-te an tel bawk a ni.

Khuallian Pu Abraham Beirazi Khithie, Addl. Deputy Commissioner chuan Lawngtlai District-a puan tahtute tih phur nan leh hmasawn duhna thinlungpu tur a chona pe thei tur ‘State Handloom Expo’ Lawngtlaiah buatsaih a ni chu lawmawm a tih thu a sawi a. Handloom chu eizawnna ngelnghet kan neihna a nih mai piah lam ah kan hnam ziarang humhalhna leh phochhuahna hmanraw tangkai tak a hmang turin kalkhawmte a chah bawk a ni. 

Handloom hmang a puan leh thuam hrang hrang siam chhuahna chuan intodelhna kawngah leh mahni ram kutchhuak chawisanna kawngah hmasawnna a thlen ngei a beisei thu Pu Abraham-a chuan sawiin hnam changkang apiangin mahni hnam ziarang humhalh leh phochhuah an ngaih pawimawh thin thu a sawi. Handloom hmang a eizawnna kalpui kawngah hmasawnna nasa tak hmuh tur a awm chu Khuallian chuan lawmawm a tih thu sawiin hetih rual hian a tih ralna lam ah a leitu turte mil zawng a puan leh thuam hrang hrang siamchhuahte pawh her rem thiam a pawimawh thu a tarlang bawk a ni. Pu C.Lalrammawia, Chairman, ZOHANDCO chuan Lawngtlai district-ah Handloom Expo tum thum buatsaihna a nih thu sawiin Mizoram hmun hrang hranga puan tahtute kutchhuak inzirtawnna hun pawimawh tak a hman thin a nih thu a sawi a. Mahni ram kutchhuak thil hrang hrangte phochhuahna leh chawisanna hun pawimawh tak a nih thu a sawi bawk a ni. 

Lawngtlaia ‘State Handloom Expo 2023’ hi ni 29, October 2023 thleng hian kalpui a ni ang a. Stall 34 awmin heng zingah hian la hlum leh puan tah dan entirna, Theme Pavillion a awm bawk a ni. Expo hawnna hun ah hian Lawngtlai district chhung a Weaver Service Centre aiawhte, Sawrkar Office hotute, Tlawmngai pawl leh khawtlang hruaitute leh MJA-te an tel a ni.