Vawii hian Mizoram KVI Board buatsaih in Lawngtlai District leh Saiha District chhunga PMEGP dawng tu tura thlan chhuah te tan ni 12 awh tur training Lawngtlai Government College Hall-ah neih tan a ni a, Lawngtlai District Additional DC Pu R. L Sangluaia chu khuallian niin training hi a hawng.

Training hawngtu Additional DC chuan ramin hma a sawn theihna tura hlawk taka tha thawhtute ni turin sawrkar chuan vawiinah a thlang chhuak ta che u a, sum leh pai tam taka a tanpui dawn che u bakah hnathawh dan tur thlengin a kawh hmuh dawn che u a ni. Chuvang chuan hlawhtling ngei tura theihtawp chhuah nachang inhriat a tul tak meuh a ni tiin training tura kalkhawm mi 70 te a fuih a. District pahnih chhung atanga diltu mi tam takte zinga a tling leh tlak nia sawrkar in a ngaih in nih ang ngeiin rintlak nih tum theuh turin ka ngen che u a ni, tiin kalkhawmte a chah bawk. Vawiina tha taka an tih chuan an hnu zela mite tan kawng an hawng a ni tih hre chunga tan la turin a ngen bawk a ni.

Training hawnna inkhawm kaihruaitu Pu H. Lalbiakliana, Lunglei District Village Industries Officer pawhin thu sawiin India rama Industry sector hnuaia thawh hlawk berte chu Small Scale Industry te an ni a, hei hian small scale Industry nep loh zia a tarlang a ni. Hei vang hian vawiina sawkar in PMEGP tanpuina dawng tura a thlan chhuah, Small Scale Industry din thei tura beiseite hi ram hmachhuan an ni, an bul tanna chuan lian lo mahse hmalam hun eng tak an nei a ni a ti a. Chutihlaiin District pahnih chhunga PMEGP an lo kalpui tawh chinah hlawhtlin pui an la tam tawklo hle a a hriat thu a sawi tel bawk.

District pahnih atang hian PMEGP tanpuina dawng turin mi 88 thlan chhuah an ni a, heng zinga mi 70 te hi training tan ni ah hian an rawn inlan nghal thei a, midangte pawh rawn tel thei thuai tura beisei an ni. Training pe tur hian Lawngtlai College a Associate Professor leh Assistant Professor mi 10 thlan chhuah niin anni hian kawng hrang hrangin zirtirna an pe dawn a ni.