Finance Department chuan Lottery chungchangah hetiang hian thuchhuah a siam :
Mizoram Sorkarin lottery a kalpui danah thil fello/rinhlelhawm a awm ni awm a PRISM in an thuchhuah The Zozam Times leh The Aizawl Post (Ni 17.4.2014) leh Vanglaini (ni 19.4.2014) daily news paper a lo lang kha thil awm dan chu hetiang hi a ni.
1. Mizoram State Lottery chungchanga mawhphurtu ber chu State Lottery Committee (SLC) a ni a, he committee ah hian Chief Secretary chu Chairman a ni a. Director, Institutional Finance and State Lottery chu Member Secretary a ni.
2. Mizoram Sawrkar chuan lottery kalpui a tum avangin the Lotteries (Regulation) Act, 1988 leh the Lotteries (Regulation) Rules, 2010 angin Expression of Interest (EOI) chu Romei (21.12.2011), Mizo Express (22.12.2011) leh Times of India, Gauhati (29.12.2011) nitin chanchinbuah a chhuah a. Chumi ang chuan heng firm pali te hian an chhang a : (i) M/s Ecool Gaming Solutions Pvt. Ltd., (ii) M/s N.V. International, (iii) M/s Summit Online Trade Solutions Pvt. Ltd. leh (iv) M/s Teesta Distributors.
3. Heng firm pali te hian Central Rules-in draw khat zela Sale Proceeds Sawrkara chhun luh tur rate hniam ber, Rs. 10,000 (rupees ten thousand) zelin an chhang (quote) a. Sorkar chuan duh thlan tur a nei lo a ni. Chuvangin heng firm pali te hnenah hian draw 6 theuh vawr (conduct) turin phalna kum 2 atan a pe ta a. Agreement chu ni 29.5.2012 khan heng firm pali te nen hian a sign ta a ni.
4. Minimum rate in heng firm pali (4) te hian an chhang na a Sorkar chuan draw khat zelah Rs. 10,500 bakah administrative expense atan draw pakhat zelah Rs. 400 Sorkara chhunglut (pe) turin heng firm pali te hi agreement a siampui zawk a ni.
5. Sorkar hian Lottery a kalpui (conduct) atang hian hlawkna tam tak a tel a, tun Sorkar kum liamta (2013-2014) khan Vbc 9.3 lai Sorkarah sum a chhunglut a ni.
6. Heng firm palite’n a rate hniam ber ang zela an chhan avang hian “heng firm pali hian diklo taka inthurualin thil anti (cartelize) a ni” tiin EOI pawh theh lut velo firm pakhat M/s Tamarai technologies Private Limited chuan Competition Commission of India (CCI)-ah vuivaina thu a thlen ta a ni. He puhna hi a dik leh a dik loh fiahna engmah a awm lo.
7. Hetiang hi thil awmdan chu a ni a, Sorkar hian ram dan kalhin thil engmah a ti lo a ni tih hi mipui ten lo hria se Sorkarin a duh a ni.
