No.258/2021-2022
Dated Champhai, the 25th April, 2021: Mizoram chhunga Covid-19 kai thar chak taka an pun avang leh Covid-19 dona kawnga thawktu ten chak leh mumal zawka hma an lak theihna turin mipui pun khawm leh chet vel chungchangah Mizoram chhunga hman tur inkhuahkhirhna thupek chu Mizoram Sawrkarin a chhuah a. Hemi chungchanga Mizoram Sawrkar Order No. B.13021/101/2020-DMR/Vol-III dated 24th April, 2021 chu Champhai District-ah April ni 26, 2021 zing dar 4:00 atanga May ni 3, 2021 zing dar 4:00 thleng kenkawh ve nghal tur a ni. He thupekin a sawi bakah Champhai District huam chhunga inkhuahkhirhna kalpui dan tur chu Pu Henry C. Lalrawnkima, Addl. District Magistrate, Champhai District chuan siam belh/tih chian hret a nih thu vawiin khan hriattirna a chhuah:
*A. Bungraw chàwkluh leh thiar chungchang* :
1. District pawn/state pawn atanga bungraw la lut/tithleng turte chuan anmahni veng VLTF hnenah a lo thlen hma ni-in an lo hriattir lawk vek tur a ni a, bungraw thlen hun tura an beisei pawh an hrilh tel nghal tur a ni.
2. Bungraw phur lut tur lirtheite chuan *zan dar 8:00 pelh hma-in Khankawn Police Checkgate* an pel hman tur a ni a, *zan dar 11:00 thleng thiar/hlan thlak phalsak* an ni ang. Zan dar 8:00-a Khankawn Checkgate thleng hman lote chuan khaw daia an nghah a ngai ang.
3. Lirthei khalhtute hian Khankawn Police Checkgate-ah *driving license / document* an thehlut tur a ni a, an haw pahin an lam leh ang.
4. District pawn/state pawn atanga bungraw phur lut lirtheite chu bungraw hlanthlak zawh veleh an let/haw leh nghal tur a ni a, phurh let tur zawngin khawiah mah an tawi khawmuang tur a ni lo a, khawtual mite nen an inchiahpiah tur a ni lo.
5. Workshop-a lirthei en fel ngai a awm a nih chuan VLTF hnenah an inhriattir hmasa tur a ni.
*B. Zin veivah leh mipui chet vel chungchang* :
1. Tul bik thil - chhiat tawhna, damlohna leh eizawnna thil pawimawh bik - a nih ngawt loh chuan zin veivah/teihawi insum rih tur a ni.
2. District Magistrate/SP/VLTF te phalna tel lovin lirthei veivah khap tlat a ni. Hei hian taxi leh autorickshaw pawh a huam vek ang a, sawrkar hnathawk duty-a chhuakte erawh a huam lo ang.
3. Champhai district chhung khaw hrang hrang atanga bazar tur leh pawimawh dang avanga Champhai kal turte bakah, khaw hran atanga Champhai lut tur reng rengte chuan an awmna VLTF te hriatpuina/phalna lehkha an nei ngei ngei tur a ni.
4. District pawn/khaw hran atanga zan riaka Champhai-a cham turte chu an thlenna VLTF-ah an inhriattir (report) nghal zel tur a ni.
5. Loh theih lohna avanga pawn chhuah ngai/zin chhuak tur (chhiatna thil, damdawi lei, inentir, ni tin mamawh lei, adt.) te chuan VLTF phalna an la hmasa tur a ni.
6. VLTF-te phalna (permit)-ah chuan VLTF seal a chuang ngei tur a ni a, VLTF-in seal hranpa an nei lo a nih erawh chuan VC/YMA seal an hmang thei ang.
7. VLTF phalna hi a diltu ten an duh anga an ziah chawp theiha siam/pek chhuah loh tur a ni. Phalna lehkhaah chuan phalna pek chhan te, phalna pek hming te leh phalna pek hun chhung chiang taka ziah lan tur a ni. Hetiang ziak chiang lo reng reng chu phalnaa pawm a ni lo ang. Phalna pek chhuah chu tum khat (1) atan zel a ni bawk ang.
*C. Bazar leh chawhmeh zawrhna chungchang* :
1. *Inrinni bikah Bazarpui khar tur a ni a*; chutih rualin, mipui mimirin awlsam zawka thlai leh chawhmeh an hmuh/lei theih nan veng hrang hrangah leh hmun tam zawkah chawhmeh lei theihna tur VLTF ten an ruahman ang.
2. VLTF-ten chawhmeh/thlai zawrhna an siam chu hmun zawl zau leh thengthaw tha (school kawt/hall kawt, adt) laiah a ni tur a ni.
3. Dawr hawn phal a ni a; amaherawhchu, dawr nghaktu ten an mahni dawrtute inhnaih taka an awm lohna turin indaidanna (rin bial/hrui thlun, adt.) an siam ngei ngei tur a ni.
4. Dawr nghaktu leh a dawrtu zawng zawng ten hmai an tuam ngei ngei tur a ni.
5. Dawr-a thil lei turte chuan VLTF phalna/rem tihna an la hmasa tur a ni, phalnaah chuan hun bithliah mumal taka tarlan tur a ni.
6. Hotel/restaurant/thingpui dawr te chu khar vek tur a ni a; amaherawhchu, DM/VLTF atanga phalna an hmu a nih chuan sem kual (delivery) phalsak theih an ni thung ang.
7. Phalna neia dawr hawnte chu tlai dar 5:00-ah khar vek tur a ni.
*D. * 1. Sawrkar hnathawk leh sawrkar sum atanga hlawh late chu hmun hrang hrangah Covid-19 Duty-in sem darh an ni ang a, anni hian mipui veivak leh Covid SOP zawm lote an thlithlaiin an vil ang a, a tul dan ang zelin hma an la ang.
2. Pisa kai turte chuan awlsam taka hmuh theihin ID an awrh/tar vek tur a ni a, an lirthei hmanah pawh an thawhna department hming an bel ngei tur a ni.
3. Pisa kai tura ruatte chuan detailment order an keng tel zel tur a ni.
*E. Pawimawh dang te* :
1. Zan lama pawn chhuah phal miah loh (curfew) hun chhung chu khauh leh zuala kenkawh tur a ni.
2. Zirna in leh Biak In te khar chhunzawm zel a ni ang.
3. State pawn atanga rawn haw, RAgT negative report neite chu mahni inah mahni hriselna chîk chung leh mi dang nena inhnaihchilh lovin ni 7 chhung an inkhunghrang ngei ngei tur a ni a; an chhungkaw member dangte pawh pawn chhuak lo leh inleng nena inchiahpiah lovin ni 7 chhung an awm tur a ni a, an in bang ualau leh remchang laiah fiah takin ‘HOME QUARANTINE’ tih an tar ngei tur a ni bawk.
4. Phalna neia pawn/khawlaia chhuak reng rengin uluk takin hmai an tuam tur a ni a, feet 6 aia inhnaihin tu mah an awm tur a ni lo. Hei hian VLTF/Covid duty te pawh a huam vek ang.
5. Damdawi lei, buhfai/ration lak, chawhmeh leh chiseh lei tura chhuah phalsakte tih loh, mipui nawlpui chu pawn chhuak lovin mahni ina inkhung/tawm tlat tur a ni.
6. Tu mahin khawlaiah emaw thlahdah takin emaw chil an chhak tur a ni lo; chutiang tilui chu dan anga hrem an ni ang.
7. Puipunna lam thil reng reng huai hawt loh tur a ni. Hei hian inneih lawmna (reception), lungphun, anniversary / birthday lawmna, infiamna, lehkhabu tlangzarh, politics / pawl thila kalkhawmna leh intihhlimna chi reng reng a huap ang.
8. Inneih inkhawm, mitthi vuina leh khawhar inah mi 30 (sawmthum) aia tam pun khawm phal a ni lo.
9. Loh theih loh thil a nih loh chuan, kum 65 chin chunglam te, taksa hriselna lama harsatna nei sa te, nau pai te leh naupang kum 10 hnuai lam te chu mahni inchhungah inkhung/inkharkhip vek tur a ni.
10. Public park, picnic spot, gym, community hall leh intihhlimna/intawllenna hmun dang zawng zawng chu khar rih tur a ni.
