No.257/2021-2022

Lunglei the 25^th April 2021 - Nimin zing atanga Lungleia kangmei chhuak chu veng hrang hrang ramah kangkaiin nimin nileng leh nizan zan khua khan veng hrang hranga mi tlawmngai leh inpe ten theihtawp chhuahin tun thlengin a thelh hna an thawk mek zel a ni. Fire & Emergency Services atangin Lunglei Fire Station SO Pu T.Lalchhandama leh a thawhpuiten kangthelh motor pahnih hmangin nimin kangmei a chhuah atang khan chawl lovin an thawk a. Assam Rifles, Lunglawn leh 199 Bn BSF-te pawh kang thelh hna thawk turin an sipai te an rawn che chhuak bawk a ni. Khua a ro tawh avangin kangmei chhuak hi thelh mih a har hle a, tlawmngaite leh kang thelhtu ten theihtawp an chhuah a, a kanna hi veng hrang hrang zawn a nih avangin a zau hle a, a thelh hna hi a hautak em em a ni. 

Lunglei Additional DC Pu M Misael chuan he kangmei nasa tak intan dan hi uluk taka chhui chhoh mek anih thu sawiin hun remchang hmasa berah kangmei chhuahna veng VC leh YMA hruaitute ko khawmin hemi chungchang hi ngun taka ngaihtuah ho anih tur thu sawiin a tul anga criminal case te pawh siam tum anih thu a sawi a. Additional DC Pu M Misael leh SDC ic DM&R Pu Collin Hlychho ten kangmei chhuahna te hi nimin leh vawiin khan a hmunah tlawhin veng neitute ruahmanna an siam pui a, DM&R changtu Minister Pu Lalchamliana leh Department hotu dangte nen phone kaltlanga an inrawn reng thu Additional DC Pu M Misael chuan a tarlang bawk a ni. Kangmei chhuahna hmuna mihring leh motor che vel lo buaipui turin Traffic Police an duty a, Lunglei police station OC Inspector LP Zohmangaiha hovin police an duty bawk a ni. 

Lunglei HPC Vice Chairman Pu Lawmawma Tochhawng, DM&R Lunglei DC Office, District Fire Prevention Committee Nodal Department - Environment, Forest & Climate Change Department-te pawhin kangmei chhuahna veng te hi tlawhin a dinhmun an enfiah a, kangmei thelhtute mamawh an ngaithuah pui bakah tlawmngai thawhchhuak te thingpui in na tur sum fai an hlan bawk a ni.

Hetih lai hian kangthelhtu pawlte chuan veng penhleh a kawngpuiah te rikrum thila tlan luh a ngaihin lirthei leh insakna bungrua kawngpuia dahte chu an harsatna leh an chet ran theih lohna chhan a nih thu sawiin hemi kawngah hian veng tin ten kawngpui zuah nachang hre turin mipui an chah bawk a ni.

Kangmei thelh hna thawk tura veng hrang hranga mi tlawmngai leh inpe rawn pen chhuak te chungah Lunglei District Disaster Management Authority (DDMA) chuan lawmthu a sawi a. Disaster Management kaihhnawiha Lunglei District chhunga Executive Magistrate/Incident Commander pasarih (7) te chuan vawiin chawhnu hian an bial an fang chhuak dawn a, ruahmanna siam tul leh Veng in an mamawh te an enfiah dawn a ni. Lunglei District Incident commanter-te chu a hnuaia tarlan te hi niin Veng/khua harsatna nei te chuan mahni bialtu Incident Commander hnenah thlen vat tur a ni:

He kangmei chhuak chungchangah hian Lunglei District Disaster Management Authority (DDMA) chu vawiin chawhnu dar 1:00 hian an Chairman Lunglei DC office chamber-ah Emergency meeting neiin an thukhawm dawn a ni.