Aizawl District Football Association (ADFA) chuan vawiin chawhnu khan Tourist Lodge, Chaltlang ah Annual General Body Meeting an hmang a, MFA President  Pu Lal Thanzara I&PR Minister nibawk chuan a hmanpui.

Khuallian Pu Lal Thanzara chuan Mizo thalai football-a tui te chawikanna leh tihhmasawnna tura thahnemngai taka an hmalakna ah ADFA hruaitute chu lawmthu a hrilh a, tunhnaia India ram football -ah Mizoram a chungnung theih chhan chu MFA, ADFA leh Mizoram chhunga district leh zone tina football lama hruaitute thawhhona leh thawhrimna rah a ni, a ti a. Kumina Khelo India Boys Football, National Sub Junior Football leh I-league ah te Mizoram club an champion leh National Junior Football leh Santosh Trophy ah te pawh runners up an ni pha chu ropui a tih thu a sawi a. MFA President  chuan  AIFF lam ngenna angin season thar ah chuan Futsal uar taka kalpui leh Futsal League mumal taka siam tum anih thu a sawi bawk a. Sairang a Mizoram sawrkarin sum a peka MFA-in football field  a chei that mek chu FIFA lamin artificial grass a thlawna an phah sak dawn chu lawmawm atih thu leh football khawvelah Mizoram  in hriat a hlawh chho ve zel chu sawrkar,  football lama hotute leh thangthar talent nei tha tak takte thawhhona rah ani, a ti a.  Tata Trusts te nen tangkawpa football zirna changtlung  “Centre of Excellence” Mualpui-ah din tum anih thu sawiin hetah hian naupang 20-30 Mizoram hmun hrang hrang atanga thlan chhuahte zirtir turin ruahhmanna siam anih thu Pu Lal Thanzara chuan a sawi bawk a ni.

ADFA General Body Meeting 2017 hi an President Pu Robert Romawia’n a kaihruai a, Honorary Secretary Pu Vanlalrawna’n season kalta chhunga ADFA hmalakna Report a pe a, Finance Secretary Pu K.Lalsangkima’n sum report a pe bawk a. Second session ah rolrelna hun an hmang nghal a ni.

He hunah hian ADFA President Robert Romawia Royte chu ADFA leh Darlawn Zone-in Mizoram football hmasawnna atana a hmalakna avangin chawimawina an hlan a ni.

ADFA General Body Meeting hmang hian Aizawl District huam chhunga Thingsulthliah, Saitual, Sakawrdai, Darlawn, Sialsuk, Phullen leh Aibawk Zone atang te-in hruaitute an lo kal a ni.

Attachment

  • Loading attachment...