Sawrkar laipui Department of Personnel & Training leh Administrative Training Institute (ATI) Mizoram tang kawpin Champhai District chhunga sawrkar hnathawk Group B leh C te tana “Induction Training Programme” an buatsaih chu vawiin khan I&PR Conference Hall, CHANEM Building-ah Champhai Bawrhsap charge la mektu Pi Lalsangpuii Hmar, Addl. DC chuan a hawng.

Pi Lalsangpuii Hmar chuan ATI, Mizoram leh sawrkar laipui thahnemngaihna a Champhai hmun ngeia Induction Training buatsaih a ni chu lawmawm a tih thu a sawi a. Sawrkar hnathawh chu thiam tawh intih theih a ni lova, nitinin thil zirtur kan neih belh zel avangin intuaithar reng angaih thu a sawi a.  Induction training chu Human Resources Development (HRD) hnuaia programme pawimawh leh sawrkar hnathawk tharte puitu tangkai tak a ni, a ti a. Training chhimtute chu training ngaipawimawha an tihturte bahlah lova hlenchhuak turin a chah a. Training chhunga an   thil zirte ngun taka zir a, hlawkpui leh tangkaipui tum ngei turin a chah nghal bawk a ni.

He induction training hi March ni 12 atanga 24 chhung awh tur a ni a. ATI Aizawl-a Associate Professor Pi Golda Dell Zohmangaihi chu Course Coordinator niin, ani ho hian training hi neih a ni ang. Training chhung hian ATI Aizawl lam atanga mithiamte leh District chhunga sawrkar department hrang hrang atangtein topic thlan bikah mithiamte hnen atangin zirtirna ngaihthlak a ni dawn bawk a ni.

Vawiin Training hawnna programme hi Course Coordinator Pi Golda Dell Zohmangaihi, Associate Professor, ATI-in a kaihruaia. Kalkhawmte lawmna thu leh inhmelhriattirna hun hman a ni a. Local Coordinator  Pi Laldinfeli, SDC-in lawmthu sawina neiin hun a khar a ni. Training tur hian sawrkar hnathawk Department hrang hrang atangin mi 38 an inziaklut a ni.