Zophaia ramri buaiah Mizoram zirlaite leh chanchinbu mite'n Assam police kut an tuar an duh lohzia lantir nan leh chak taka hma la tura sawrkar kar nan vawiin khan Lai Students' Association (LSA) chuan Lawngtlai DC office-a thawktute pisa kai tur an dang a. Boruak tha lo leh buaina thleng erawh a awm lo.

LSA chuan inrinni zan atang khan Lawngtlai District chhunga hnam dang (non-tribal) pawn chhuah khapin, sumdawnna pawh kalpui chhunzawm lo turin an hriattir a. Tukin zing dar 8:30 atang khan DC office gate pawnah LSA hruaitute leh Govt Lawngtlai College zirlai eng emaw zat chhuak khawmin, an pisa kai tur an lo dang a. Magistrate leh police lamin vil bawkin, chanchin tha lo hriat tur a awm lo.

Chawhma dar 11-ah District Administration lam leh LSA hruaitute chu DRDA Project Director Pu R. Lalremsanga MCS hovin an inkawm khawm a. He hunah hian Election Officer Pu Lalrinawma MCS, SDC Pu Lalsanglura MCS, SDPO Pu Victor Zothansanga MPS, DIPRO Pu C. Lalhruaitluanga MIS, LSA President Pu Lalchhuanliana leh hruaitu dangte bakah, press mite an tel.

Lawngtlai DC chu meeting pawimawh vangin Aizawlah a la awm mek a. District Administration ai awhin officer awm ang angte chuan mipuiin harsatna an tawh tam loh nan LSA picketing chu titawp tawh mai turin an ngen a. LSA hruaitute chuan an zirlaipuite tuarna chuan an rilru a tihnat em avangin DC office dan chu an chet nep theih dan ber a nih thu sawiin, official te'n District tana hna thawh duhna rilru pua an ngenna chu lawmawm leh zahawm an tih rualin, a tawp thlenga dan law law an tum tlang thu an sawi a. Sawrkar official lam chuan Lawngtlai District-a hnam dang awmte'n kut an tuar loh nan leh an dawr te pawh rawksak an nih loh nan LSA chu zirlaite leh khawlaia zu rui vak velte pawh veng pah turin an ngen a. Zirlaite leh anmahni viltu magistrate leh police lam chu tul lova innawr chiam ngai lo tura boruak muanawm tak vawng hram hram turin an ngen bawk.

Attachment

  • Loading attachment...