India sawrkar laipuiin Tribal te (SC/ST) leh hmeichhiaten an hmakhua an suiha an indin ngheh ve theihna tura Loan Scheme tha tak a buatsaih Stand Up India Scheme chu Serchhip District chhungah ngaihventu an tlem avangin Bank ten hemi scheme hnuaiah hian loan pek an la nei lo.

He Scheme hi India Prime Minister in Dt 5^th April, 2016 khan hawngin, ST/SC emaw hmeichhia, sumdawnna leh thilsiam chhuahna emaw kawnga bul tanna tur ruahmanna leh suangtuahna tha neite tana buatsaih niin Rs. 10 lakh atanga 1 Crore thlenga Bank atanga pawisa puk theihna Scheme a ni a. Bank Branch zawng zawngte chu he Scheme hnuaia Loan pechhuak theuh tura beisei niin, Loan an pekchhuah dana a interest hniam thei ang ber rate (lowest applicable rate) a pechhuak tura tih an ni a, kum 7 chhunga rulh let tur leh Moratarium thla 18 nei tura duan a ni. Loan hi Composit Loan a pek chhuah tur (75% of the project cost inclusive of term loan and working capital) niin a target trade ber chu Manufacturing, Trading or Service sector a ni.

Dt 7^th March, 2018 a Serchhip District Consultative Committee, Bawrhsap Pi Sangchhin Chinzah hova neihah Stand Up India Scheme ngaihventu Mizorama an tlem thu leh Serchhip District ah phei chuan tun thlenga he Scheme hnuaia dilna lut pakhat chauh a la awm thu sawichhuah a ni a. He Indian Flagship Programme pawimawh tak, Tribal (SC/ST) leh hmeichhiate dinchhuahna tur loan ruahmanna hi lehkhathiam hna nei lote, sumdawnna leh thilsiam chhuahna hlawhtling ngei tur din thei turten ngaihven se tha an tih thu Committee hian an tarlang a ni.

Hrechiang duh tan mahni hnaih ber Bank Branch ah te, www.standupmitra.in ah te zawhchian leh enfiah theih a ni.