Vawiin hian Lawngtlai DC Conference Hall ah Department of Personnel & Training bul tumin Atministrative Training Institute, Mizoram chuan Right to Information Act 2005 chungchang zirhona ni hnih awh tur chu a buatsaih.

Lawngtlai Addl. DC Pu R. Lalsangluaia’n he training hi hawng in Right to Information Act hian sawrkar hnathawkte tan leh ram mipuite tan mahni zawn theuhva ram rawng bawl theihna kawng zau takin min hawn saka, hei hi kan hmang tangkai thiam hle tur a ni, a ti a.RTI zir tura thlan kalkhawmte chu tha taka RTI chungchang zir tur leh hrechiang turin a fuih a ni.

ATI atanga lokal Pu Vanlalvuana, Dy. Director chuan he training hi kaihruaiin District tinah RTI Training buatsaih a nih tur thu leh RTI Workshop te pawh buatsaih a nih tur thu a sawi a. Right to Information Policy nei tha ram apiang hi an changkang chak zawk tih khawvelin a hriat tawh avang leh hemi atana sum sen hi channa a nilo tih finfiah a nih avangin nasa zawka kan beih zel a tul a ni, a ti.

RTI zirna hun ATI in a buatsaih ah hian ATI in Lawngtlai District Resource Person atana a lo thlan tawh Pi Lalhlimpuii, Lecturer, Govt. Region Higher Secondary School, Lawngtlai leh Pu C. Lalthlamuana, Asst. Professor, Lawngtlai College ten zirtirna an pe a, Lawngtlai District chhunga Departmental Appellate Authority, Public Information Officer, Assistant Public Information Officer leh RTI Dealing Staff, Department hrang hranga mite an tel a ni.

He training hi naktukah chhunzawm ani ang.