Nimin (1.3.2016) Thawhlehni chawhnu khan Biate ah Forest Department in Rest House an sak thar chu Home Minister Pu R. Lalzirliana'n a hawng. He hunah hian Environment and Forest Minister Pu Lalrinmawia Ralte chu khualzahawm niin Pu R. Vanlalvena, ZOHANCO Chairman chuan khuallian hi a tawiawm a ni.

Home Minister chuan Mizo mipuiten thing leh mau, ramngaw leh a chhunga cheng nungcha te humhalh nachang kan hriat loh avangin Mizo mipuiten sik leh sa inthlak leh tui hna lamah harsatna kan tawk chho ta mek a ni, a ti a. Mizoram hi thlir mai chuan ngaw la that viauna hmun niin lang mahse han bih chian chuan India ram chhungah ngei pawh ramngaw dur tha, Virgin Forest sawi tur nei lo pawlah kan awm tawh a ni a. Ramngaw leh nungcha te hi Forest Department leh Sorkar kutah chauh dah lovin mitin hian mawhphurh a kan nei tih kan hriat a ngai a ni, Home Minister chuan a ti a.

Khualzahawm Forest Minister Pu Lalrinmawia Ralte chuan thu sawiin Environmental & Forest Department thlirna atang chuan Tuichangral khaw hrang hrang te chu nungcha humhalhna kawngah an hmalakna te chu fakawm a tih thu a sawi a. Tunhnaia mi thenkhat in China Airgun, enlenna invuah hmanga nikhat a sava 200 chuang an kapthla tih Facebook lamah te hmuh tur a awm chu thil pawi tak a nih thu sawiin, hemi chungchangah hian mipuite hnenah inzirtirna, Awareness Campaign pawh uar zawk a kalpui a la tul dawn a ni, a ti a. Tunah hian District tin Bawrhsap-te hnenah sava leh nungcha te humhalhna thupek an tih chhuah tir tih sawiin hei hian ngaih pawimawh a hlawh loh chuan Dan khauh zawk leh hun rei zawk daih tur tih chhuah leh a ni ang, a ti.

Forest Rest House hawnna inkhawm hi Pu Lalduhthlana, DFO, N. Vanlaiphai chuan kaihruaiin, Pu V. Lalfala, Conservator of Forest, Southern Circle chuan lawmthu sawiin hun hi a titawp a.

Khuallian, Khualzahawm, ZOHANCO Chairman leh CF te hian Biate Forest Rest House hawn hriatrengna thingkung an phun bawk. Rest House hi nikum June ni 2 atanga sak tan niin a Building sakna atan leh a chhung cheina atan te leh Rest House bulhnaia lungremna atan te a zavaia sum sen zawng zawng hi cheng nuai 30 bawr vel sen a ni.