Mizoram sorkar Sports & Youth Services Department hmalakna peng pawimawh tak Adventure Sports, thalaite nun kaihhruaina atana tangkai tak mai chu uar chhoh zel a ni a. Adventure lama programme lian tak pakhat, lawnglenga luidung zawh - White Water Rafting Expedition chu 9 - 14 April, 2012 chhung hian Chhimtuipui luiah neih a ni dawn.

Tun tuma Mizoram White Water Rafting Expedition chu 9 April zing dar 7:00-ah Directorate of Sports & Youth Services kawt, Khatla kawn atangin an chhuak ang a, Sangau-ah riakin 10 April-ah Saisih (Chhimtuipui) atangin Rafting Expedition hi an tan ang. He Rafting Expedition chhung hian Mizo thawnthu-a nupa tuak sarih inthen tir thei khawpa hmuhnawm a an sawi Chhimtuipui leh Tiaului infinna lai chu an paltlang dawn a. He Expedition-ah hian suar hlauhawm tak tak engemawzat chu rubber dinghy (thelret lawngleng) hmangin an paltlang ang. He Expedition-ah hian ni li leh zan thum luidung zawhin 13 April-ah Darzokai (Tuipui ‘D’) ah Expedition hi an zo ang a, a tuk 14 April-ah Aizawl lam panin an lo haw leh ang.

He White Water Rafting Expedition-a tel tur te chu Mizoram chhunga Adventure Club hrang hrang atanga member Watermanship Course / Rafting & Canoeing Course zo tawh te an ni dawn a ni.