Ram pum huapa Socio-Economic & Caste Census-2011 kalpui mek chungchangah Aizawl district huamchhunga Supervisor te leh Data Entry Operator te tan vawiin khan I&PR Auditorium-ah training buatsaih a ni.

Training-ah hian Supervisor te tih tur leh mawhphurhna te inhrilh hriat a ni a, hriatfiah tul leh diklo lo awm palh thei te tih dik dan tur chungchang inhrilhfiah a ni bawk. Dik leh felfai thei ang bera he hna hi zawh a nih theih nan Claims and Objection chungchang te pawh inhrilhfiahna neih a ni.

Training hi Rural Development Department leh Urban Development & Poverty Alleviation Department te tangkawpa buatsaih a ni a. Pi Ramdinliani, Joint Director, Administrative Training Institute leh Nodal Officer (Rural), SECC-2011 in kaihruaiin, National Trainers atana ruat Dr. James L.T. Thanga, Mizoram University, Pu Lalhmachhuana, Education Department leh Pu V. Govinda Rajulu, Electronic Corporation of India Limited ten training hi an pe a ni.

Dik leh felfai taka he hna hi zawh anih theih nan chhungtin te chu Draft List chhuah hunah anmahni chhungkaw dinhmun dik taka chhinchhiah a nih leh nih loh ngaihven theuh turin ngen an ni a. Aizawl leh Kolasib district bikah chuan Supervisory round hi April thla chhunga zawh tur a ni a, April thla tawpah Draft List hi tlangzarh tura beisei a ni. Draft List hi khawtin/veng tinah tarchhuah a ni anga, mahni chhungkaw dinhmun tarlan a nih dan te chik taka lo enfiah theuh turin mi zawng zawng ngen leh beisei an ni.

Hetih lai hian Champhai, Mamit leh Serchhip district-ah te chuan house-to-house enumeration kalpui mek a ni a, heng district-a mipui te chu Enumerator ten an in an tlawh hunah an chhungkaw khawsak dinhmun chiang leh dik taka lo report turin ngen an ni bawk. Enumeration zawh a nih hnuah Supervisory round hi chhunzawm ve leh a ni ang.

Lawngtlai, Lunglei leh Saiha district-ah te chuan Socio-Economic & Caste Census hi tan a la ni ve lova. Saiha erawh chu Mara Autonomous District Council inthlan hmaa enumeration hi tih zawh hman tum a ni.