Vawiin chawhma dar 11 khan Champhai I&PR Auditorium-ah Pu S. Laldingliana, Parliamentary Secretary, Sports & Youth Services etc. chuan infiamna lama mi hmingthang chawimawina hun ‘Incentive Cash Award for Champhai District’ hmanpuiin infiamna kawng hrang hranga tithate hnenah chawimawina sum fai a hlan.
Sports & Youth Services Department buatsaih inkhawmah hian Khuallian Pu S. Laldingliana chuan thu sawiin Champhai District in DC fel tak, la naupang leh viak tha, hmasawnna kawnga tuan tha tak leh infiamna lamah pawh hruaitu tha tak an neih avangin lawmthu a sawi a, Champhai District chu Mizoram District 8 zingah Infiamna hmunhma (Sports Infrastructure) nei tha ber zing ami a ni tih sawiin Vanlallawma Indoor Stadium (VANIS) phei hi chu North East India-ah a tha ber zinga mi a ni a ti.
Khuallian chuan Chief Minister infiammi, vawiin thlenga la tui em em kan nei a, Sports Minister tawh zawng zawnga la tha ber Pu Zodintluanga kan nei bawk a, anni hmalakna zarah Mizoram District hrang hrang ah Sports Infrastructure kan nei thluah thluah a, Infiammite pawhin National Level ah Medal kan hawn zut zut a, eizawnna atana hmangtu Footballer engemaw zat Phai lamah an awm fer fur tawh bawk a, tun hun hi Mizo Infiammite tan ‘Hun Rangkachak’ a ni mek a ni, a ti. Khuallian chuan kan Chief Minister in Mizo thalaite hi a hrechiang a, talent cho chhuah tham a awm a ni, a ti thin. Tunlai hunah induhsakna avang ringawtin a hlawhtlin theih lohva, a thei apiang din chhuahna (survival of the fittest) a ni tawh a, Infiammiten tih tak zeta hma in lak chuan hlawhtlinna chance a tha em em tawh a, chumi atan chuan sorkar pawh a inhawng zau em em a ni, tiin he hun rangkachak hmang tangkai turin Mizo Infiammite a sawm a ni.
Sports & Youth Services Department Director Pu Lalzirmawia Chhangte pawhin thuhma sawiin Sports Incentive Cash Award hi kum 2001 atang khan kalpui tan a ni a, kum 2003 khan tih changtlun a ni a. He scheme siam anih lai khan Zofate zingah a dawng thei an awm ang em ? tih a ni thin a, mahse kumin ah mi 302 hnenah sem a ni a, nakum ah kum 2012-2011 chhunga Medal la mi 600 chuang hnenah sem leh tum mek a ni a, hei hian Infiamna lama Mizoten hma kan sawn nasatzia a tarlang a ni. Tun tuma sem hi kum 2009-2010 a National Level chin a Medal la te an ni a. Champhai District bikah mi 34 awmin Aizawl tih lovah chuan a dawng hnem ber an ni. Champhai District a infiammi 34 te hnenah Rs. 3,30,250/- sem ral a ni.
He inkhawmah hian Champhai District Sports Committee Vice Chairman Pu C. Lallianpuia pawhin thu tawi sawiin Champhai in Infiamna lama a mamawh chi hrang hrang te Khuallian hnenah a thlen nghal a. Champhai District a Sports Incentive Cash Award dawngtute hnenah CDSC hmingin Certificate sem a ni bawk a ni.
Champhai District chhunga mite tan Sports Incentive Cash Award semna hi Pi K. Lalliantluangi, Joint Director, Sports & Youth Services in vote of thanks a sawi zawh hnuah tih tawp a ni, hemi hnu hian Parliamentary Secretary Pu S. Laldingliana hian Chhangphut Field a Boys Hostel leh New Champhai a Tennis Court sak zawh tawh te a hawng leh a ni.
