1635/2024-2025

Champhai, 17th August 2024: Adviser to CM (Technical), Er H. Ginzalala, Champhai North bialtu ni bawk hovin vawiin khan Champhai District leh Champhai North Assembly Constituency huamchhunga hmasawnna ruhrel din tumna hmun te enfiah a ni.

He hunah hian Champhai Bawrhsap Pu VL Remliana, Khawzawl Bawrhsap Pu Vanlalṭhiana, sawrkar department aiawhte leh khawtlang hruaitute an tel a. Champhai Khankawn Police Checkgate bula Soil Bank siamna tur leh NH-06 Tuipui - Tuimuk inkara Center of Excellence: Recreational Center, Cold Storage leh bazar changtlung tak awm kawp theihna tur hmunhma te enfiah a ni.

Er. H. Ginzalala chuan ram leilung tichhe tlem zawnga hmasawnna hna kalpui a tul tih sawiin, hna tak tak thawh ṭan hmain Soil Bank mumal tak ruahman lawk a tul a ni, a ti a. Khankawn Police Check-Gate bul ruam dawl zawl a nih chuan, Champhai khawpuiin kawtchhuah nuam zawk a nei ang a. Mipui mai bakah dan leh thupek kengkawhtute tan pawh awlsamna a thlen dawn a ni, a ti. Adviser to CM hian Champhai khawpui veta Circular Ring-Road siam a nih hunah pawh Khankawn Soil Bank chu ṭangkai taka hman theih a beisei thu a sawi bawk.

NH-06 Tuimuk-Tuipui inkar, Neihdawn ram chhunga Center of Excellence: Recreational Center, Cold Storage leh bazar changtlung tak din tumna hmun pawh Er. H. Ginzalala ho hian enfiah a ni a. Neihdawn khua atanga NH-06 pawh tur Link Road laih a, kuthnathawktute inphochhuahna tur, khualzinte tan pawh a tlawh chhenfakawm tak hmunhma din tumin ruahmanna siam chhoh mek a ni tih Adviser to CM hian a tarlang.

Hmasawnna ruhrel dinna tur hmunhmate a enfiah zawhah Adviser to CM, Er. H. Ginzalala hian Aizawl a pan zui nghal a ni.