1624/2026-2027

Lawngtlai, 3rd August 2026: Vawiin khan Dr. Lorrain Lalpekliana Chinzah, Adviser to Chief Minister (H& FW, A& FW) leh Lawngtlai East bialtu MLA nibawk hovin DC Office Chamber-ah ah KMMTTP Road- a leimin thin chungchangah thutkhawm neih a ni a. Bawrhsap Pu Donny Lalruatsanga chuan hun a kaihruai.

Dr. Lorrain Lalpekliana Chinzah chuan kalkhawmte chibai a buk a. Leimin vanga KMMTTP kawngpui pawimawh tak kaltlang theih loha a awmfo thin chu veiawm a tih thu a tarlang a. PWD ( Multi Modal Project Division) ten Leimin thenfai hna an thawh thinna leh CYLA- ten theihtawp an chhuahpuina fakawm a tih thu tarlangin, tha thlah lova thawk zel turin a chah a. KMMTTP kawngpui chu nakum maia hawn tur a nih angin sawrkar pawhin theihtawp a chhuah reng tih a sawi. Minstry of Road Transport and Highways (MoRTH) kaltlanga 'Repair & Maintenance' hnathawk tur Company -te inbun fel hmaa harsatna awmte chingfel tura hmalak a nih tur thu a sawi a. Hemi atan hian MLA chuan Chief Minister, PWD Minister leh PWD hotute hnena DO letter bakah hmaichhan ngeia hmuha harsatna awmah te hmalakpui tura a thlen tur thu a tarlang bawk a ni.

Pu Donny Lalruatsanga chuan kawngpui pawimawh tak, khaw tam takin ei leh bar an lakluha leh sumdawnna kawngpui pawimawh tak a nih angin, kawng a tlang that a tul hle a ti a. District Disaster Management Authority (DDMA) Chairman - a nihna anga a hmun ngeia a tlawh fo thin thu tarlangin, PWD ( Multi Modal Project Division) te pawhin vawi tam an thianfai tawh a ni, a ti. Leimin vanga harsatna tawh thulha thenfai zung zung a nih theih nan mamawh hrang hrangte thuneitu sang lamah ziaka thlen a nih tur thu a sawi a ni.

CYLA, VC Association leh MJA Lawngtlai te pawhin KMMTTP Kawngpuia leimin thin vanga mipuiten harsatna hrang hrang an tawh thinte sawizauna an nei a. Mipuite harsatna sutkian kawnga theihtawp chhuah turin sawrkar Official- te an ngen bawk a ni.

Thutkhawmah hian PD (DRDO), Additional SP, DIPRO, SDC, JE (PWD, Multi Modal Project Division), President, CYLA, President, VC Association, leh President,  MJA Lawngtlai te an tel a ni.