2678/2026-2027 

Aizawl dated 14th October 2026: Vawiin khan Dr. KC Lalmalsawmzauva, Adviser to Chief Minister (Implementation of Handholding Scheme) chuan Mizoram Sawrkar flagship Scheme hnuaia support price ruahman sak, thlai thlan bik panga zingah Aieng sawngbawlna hmun, Mizoram Turmeric Processing Industry, Lushai Organics, IGC Luangmuala tlawh a. He hunah hian Mizoram State Project Coordination Committee member leh Chief Executive Officer, Implementation of Handholding Scheme-te an tel a ni.

Adviser to Chief Minister Dr. Lalmalsawmzauva chuan Handholding Scheme hnuaia kuthnathawktute tih hmasawnna tura thlai thlan bik panga te tana Support price ruahmanna chuan Mizoram khaw hrang hranga kuthnathawktute a takin a luhchhuah mek thu a sawi a. Heng thlai thlanchhuah zingah hian Sawhthing thar chhuak an thahnem rih ber tih sawiin, thlai thlanchhuah dangte man man zawka tiral tura buatsaih a nih theih nan a sawngbawlna hmunhma tha neih a pawimawh thu a sawi a. Chumi tur chuan IGC Luangmual ah hian Handholding Scheme kaltlangin Mizoram Turmeric Industry hmunhma hi tih changtlun a nih thu a sawi. 

Adviser to Chief Minister chuan kuthnathawktute dinhmun siamthat nan hian, thlai thar chhuak tam tura kuthnathawktute kan kaihhruai hmain, thlai thar chhuahte tih ralna tur 'Market' tha duan chhuah hmasak chu a pawimawh thu a sawi a. Hei hian harsatna tam tak awm thei a sutkian phah theih thu sawiin, IGC Luangmuala Mizoram Turmeric Processing Industry hi Aieng Market tha tak siamna tura hmanraw tangkai a nih ngei a beisei thu a sawi.

Lushai Organics CEO Pu H.Lalchhanhima chuan Mizoram Turmeric Processing Industry kaltlang hian kum 2025 atang khan Aieng quintal 2000 vel lei khawm leh sawngbawl a nih tawh thu a sawi a. Heng Aieng sawngbawlte hi gram 50 leh gram 200 a pack a nih bakah a mamawhtute duh dan a zirin tih ral a ni bawk, tih a sawi a. Lushai Organics ah hian thawktu mi 12 an awm mek a, Aieng dip (powder) bakah hian Aieng atanga siamchhuah product chi hrang hrang leh thlai leh thei dang sawngbawlna atangin product 18 an siamchhuak bawk a ni. Adviser to Chief Minister hova Lushai Organics, Luangmual IGC tlawhna ah hian Aieng lei khawlsa dahthatna tur Warehouse sakna tur endik a ni bawk.