2337/2024-2025

Dated Lawngtlai, 2nd October 2024 : Tukin zing dar 7:30 khan Urban Development & Poverty Alleviation (UD&PA) bultumin 'Swachhata Hi Seva' leh 'Cleanliness Week' kharna inkhawm chu DC Conference Hall- ah neih a ni a. Pu Cheemala Siva Gopal Reddy, IAS, District bawrhsap leh Chairman, District Level Steering Committee on Swachhata Hi Seva- nibawk chuan inkhawm hi kaihruaiin, Dr. Lorrain Lalpekliana Chinzah, Adviser to Chief Minister leh Lawnglai East bialtu MLA nibawk chuan khuallian niin a hmanpui.

Dr. Lorrain Lalpekliana Chinzah chuan kawlkhawmte hnena lawmthu sawina a nei hmasa a.  India ramin faina beihpui thlak turin kum 2014 khan 'Swachh Bharat Abhiyan' kalpui tanin, hemi hnuaiah hian inthiarna (toilet)  vaibelchhe 11 siam niin, khawlaia inthiar mai thin chu za zela sawmkua laiin a tla hniam a; he hmasawnna bawhzui nan hian 'Swachhata Hi Seva' chu kum 2017 atang khan kalpui a lo ni ta a ni, a ti. Mizoramah pawh Kum 1997 atang khan Cleanliness Week- hmang tan niin, kum tinin September ni 25 atanga October ni 2 chhung hman thin a nih thu a sawi a. UD&PA leh PHED hmalakna a Lawngtlai District- a "Safai Apnao Bimari Bhagao, Swachhata Hi Seva leh Cleanliness Week" te tluang taka hman a ni chu a lawm hle a ni, a ti.

Khuallian chuan Mizoram sawrkarin UD&PA  kaltlanga Mizoram Cleanliness Competition leh Sawrkarlaipuiin khawpui fai inelna ( Swachh Survekshan) a buatsaih thinah Lawngtlai District- a tichhe pawl a ni thin chu veiawm a tih thu tarlangin, dinhmun tha zawk hauh thei tura tan lak a tul hle a ti a. Faina hi mimal, khawtlang,  ram leh hnam hmel lanna a ni a, faina hian hriselna a kengtel tih hriata  thangtharte entawn tlak ni tura  mitinin ke pen  a tul thu a sawi. Nalh  leh mawi taka inchei ringawt hi a tawk lo a, mahni  In leh a chhehvel, khawtlang a fai loh chuan thil zahthlakah a chang mai thin tih tarlangin Dr. Lorrain Lalpekliana Chinzah chuan Lawngtlai khawpui a lo fai a, a lo thianghlim zawk nan mitinin mawhphurhna an nei tih hre reng turin a chah.

Hman khat daih Plastic hmang lo tura hmalak a tul thu sawiin MLA chuan tuikhur, luikawr, lui hnar leh luiah heng plastic -te hi tangkhangin, tui thianghlim in tur thlengin a tibawlhhlawh thin  a ti a. Lawngtlai khaw luh dawnah langsar taka bawlhlawh paih a ni thin chu pawi a tih thu sawiin, a paihna hmunah chauh bawlhhlawh paih thin turin Lawngtlai mipuite a  ngen a. In sakna bungrua leh bawlhlawh hrim hrim ram ruak ramchanga paih mai ching an awm thin chu thil tha lo tak a ni tiin, sim thuai a tul hle a ni, a ti. Lawngtlai khawpui a lo fai leh thianghlim zawk nan tuichhe paih kawngah fimkhur a ngaih tak zet thu sawiin khuallian chuan mipui punkhawmna hmun, khelmual, vantlang zunin leh inthiarna hmunte fai tak enkawl tura mitinin tan la thar turin a chah a. Khawtlang enkawltu VC, sawrkar hotute, zirlai naupang leh tlawmngai pawl hrang hrangte faina kawnga hma la thar zel turin a sawm a. Lawngtlai khawpui bawlhlawh senghawitu ber Sanitation Department, LADC, UD&PA, PHED, NSS Govt. Region Higher Secondary School leh Eco Club, Downtown English School- te faina hapta chhunga an hnathawhah Dr. Lorrain Lalpekliana Chinzah chuan lawmthu a sawi nghal bawk.

Pi Margaret J. Vanalremmawii, DPO, UD&PA chuan Swachhata Hi Seva leh Cleanliness Week 2024 - hman chhunga khawpui chhunga hmalakna hrang hrang tarlanna a nei a. Safai Apnao Bimari Bhagao- hnuaiah 'Mass Cleanliness Drive' chu Lawngtlai khawpui chhung  veng hrang hrangah neih a ni a, Hoarding - hmun 6- ah tar niin, Self Help Group kaltangin chenna Inah faina inzirtirna neih niin, KMTTP kawngpui dungah hman khat daih plastic chhar fai hnatlang neih a ni bawk a ti a. Lawngtlai khawpui chhungah   Celanliness Target Unit (Bawlhhlawh a hmun ni lova paihna hmun) -15 chu tihfai a ni bawk  ti . Tuipui Ferry kawngah thing tiak 15 phun niin, PHE tuisem leh Sanitation Workers, LADC-  te tan hriselna  endik runpui neih a nih thu tarlangin, zirna In  leh Sawrkar Ofiice zawng zawngah 'Swachhata Pledge' neih vek a ni bawk a ti. Pu Netralal Jaisi,  EE,PHED chuan report pein, Swachhata Hi Seva 2024( Gramin) hnuaiah Swachhata Mein Bhagidari (Faina hnatlang/ pledge/ Gram Sabha leh Quiz) chu khaw hrang hrangah neih niin,   Celanliness Target Unit (Bawlhhlawh a hmun ni lova paihna hmun zawnchhuah) chu khaw - 97 ah zawnchhuah niin tihfai nghal vek a ni, a ti a. Swachhata Hi Seva-  puala faina lam inzirtirna (Awareness) leh kawngzawh (Rally) chu thingtlang khuaah neih a nih thu  tarlang bawk.

Swachhata Hi Seva leh Cleanliness Week 2024- puala Poem leh Slogan Writing Competition-  lawmman semna neih nghal niin, Dr. Lorrain Lalpekliana Chinzah chuan lawmman semna a nei a, lawmman dawngtute chu a hnuaiah hian tarlan a ni.

Poem Writing  Competition
1. K. Lalrinawmi - Class X - Don Bosco School
2. Lalrambeiseisangi- Class X- Downtown English School
3. Monica HT Lalrinthari - Class XII (Arts) - Harvard Higher Academy
Consolation Prize - Esther Lalruatpuii - Class -IX - Don Bosco School

Slogan Writing Competition
1. Biakthapari - Class XII - Don Bosco School
2. H. Lalremruati - Class X - Downtown English School
3. Lalneihpuii- Class XII- Jehova Jireh Higher Secondary School
Consolation Prize - Joseph Malsawmdawngliana - Class XI-  Don Bosco School

Best Sanitation Worker under Sanitation Department, LADC chu Pi Lalnunpuii leh Pu Vanlalzaua hnehah hlan niin, Pu Cheemala Siva Gopal Reddy chuan Certificate of Appreciation - 7 hlanna a nei bawk.

Vawiin 'Swachhata Hi Seva leh Cleanliness Week 2024' kharna inkhawmah hian sawrkar department hrang hrang hotute, Zirtirtu leh Zirlai naupang, MJA, Lawngtlai leh Sanitation Workers, LADC-  te bakah Lawngtlai District Village Council Asdociation aiawh an tel thei a. Pu L. Sangromuana, SDO, Lawngtlai WATSAN Sub- Division, PHED chuan kalkhawmte hnena lawmthu sawina neiin hun a khar.