2338/2024-2025

Aizawl, the 1st October, 2024: UD&PA Department leh PHE Department tangkawp buatsaihin vawiin chawhma dar 10:30 khan ram chhung hmun dangte rualin Faina Ni 'Swachhata Diwas' chu Assembly Annexe Conference Hall, Treasury Square, Aizawlah lawm a ni a. He hun hi Mizoram Governor Pu Indra Sena Reddy Nallu chuan khuallian niin a hmanpui a, hemi puala Cultural Fest buatsaih a hawng a. Swachhata Hi Seva hnuaia intihsiakna lawmman a sem bakah faina kawnga hmalatu Safaimitra-te chawimawina thilpek a hlan nghal bawk.

Khuallian Governor Pu Indra Sena Reddy Nallu chuan kalkhawmte chu Swachhata Diwas pual chibai bukin, Prime Minister thahnemngaiha hnuaia rampum huapa faina kawnga hmalakna kalpui mek chu hetiang lam hawi khawvel pum huap hmalakna lian ber a ni, a ti a. Faina chu kawng engkimah nunpui a tul thu leh mimal, pawnlam leh chhungril nun bakah khawtlang huapa kalpui a tul thu sawiin, faina kawnga beihpui thlakna kum 10-na hmel hmuta Swach Bharat Mission chu kan zavaia tanrualna avang chauha hlawhtling a ni, a ti a. Faina kawnga hmalakna chuan India rama hmeichhiate dinhmun, hriselna leh nunphungte a chawikan nasat thu sawiin, faina chu tun mai nilo kan nitin nun leh tih danphungah kan lakluh a ngai a ni, a ti a. Mizoramah khawpui leh thingtlang lamah nung tak maia Swachhata Hi Seva Campaign kalpui a ni leh mipuite'n hluta faina kawnga mi thahnem takte phur taka an pen chhuak chu lawmawm a tih takzet thu sawiin, hemi kaihhnawih department hrang hrangte hmalakna fakawm a tih thu a sawi a ni.

Pu Indra Sena Reddy Nallu chuan Mizote'n faina an nunpui nia a hriat thu leh atak ngeia a hmuh dante bakah faina hnatlangpui neih a ni thinte chu ropui a tih thu sawiin, India ram hmun dangte tana entawntlak nih tum zel turin Mizo mipuite a fuih a. Swachhata Hi Seva intihsiaknaa tithate a lawmpui thu leh faina kawnga hmala tha Safai Mitra-te inpekna fakawm a tih thu sawiin, hmalakna chhuanawm tak chu chhawmnung zel turin a fuih a. Prime Minister-in India ram chu kum 2047 ah ram changkang Viksit Bharat a hlangkai tura tanlak a nih tur thu a sawi tihlawhtling turin faina leh hrilselna chu peng pawimawh tak a ni tiin, India ramin bung thar a kai theih nana faina ngaipawimawh theuh turin Mizo mipuite a sawm a ni.

Thusawitu dang Chief Secretary Dr. Renu Sharma, IAS, Chairman, State Steering Committee, Swachhata Hi Seva 2024 chuan faina kawnga Line Department pawimawh tak pahnih UD&PA leh PHE Department hnuaia thawktu zawng zawngte hmalakna chhuanawm a tih thu a sawi a. Faina kawnga District tina hmalatu DC kaihhruai District Steering Committee-te hmalakna chhuanawm a tih thu sawiin, khawpui leh thingtlang lama faina kawnga hmalaknaah khawtlang mipuite phur taka an tel thin chu ropui a tih thu a sawi a. Fai tura hmalakna chu Department nilo, kan zavai tanrualna tur zawk a nih thu a sawi bawk a. Kumin faina beihpui thlak chhungin programme hrang hrang 500 dawn buatsaih a nih thu leh mi 10,000 chuang an tel thu a tarlang bawk.

He hun hi PHED Secretary Er. F. Liantluanga chuan kaihruaiin faina kawnga hmalakna kalpui dante a sawi a. Pi Zarzokimi, Jt. Secretary, UD&PA Department kaihhruaiin Swachhata Diwas pual fai tura intiamna thutiam sawi rual a ni a. Kum 10 kalta chhunga Mizorama Swachh Bharat Mission kalpui tawh dan tlangpui leh Swachhata Hi Seva 2024 hman dan video enho a ni a. Governor-in Swachhata Hi Seva 2024 hnuaia intihsiakna lawmman a sem bakah faina kawnga hmalatu Safai Mitra-te chawimawina thilpek a hlan nghal a, Swachhata Diwas puala waste to art sculpture leh street food stall siamte a fang kual nghal a ni.

He hunah hian Pi Baryl Vanneihsangi, MLA, Aizawl South-III, Sawrkar Department hotute leh sawm bikte an tel tha hle a ni.

Swachhata Hi Seva puala lawmman dawngtute chu hengte hi an ni:-

1. Waste to Art Sculpture Competition (High School & Higher Secondary School 10 atangin mi 34 an tel):

Pakhatna: Romuanpuii Ralte, Class-IX A, Mt. Carmel School (Rs 35,000/- + Certificate) 

Pahnihna: Grace Lalrinmawii, Class-X 'A' St. Pauls HSS (Rs 20,000/- + Certificate) 

Pathumna: Aizawl Christian Academy (Rs 15,000/- + Certificate) 

2. College Level Swachhata Competition:

Pakhatna: Pachhunga University College (Rs 35,000/- + Certificate)

Pahnihna: Govt. Zirtiri Residential Science College (Rs 20,00/- 0+ Certificate)

Pathumna: Govt. Aizawl College (Rs 15,000/- + Certificate)

3. SBM-G hnuaia SHS 2024 activity hrang hranga titha lawmman dawngtute:

Pakhatna: Sesawng (Rs 5,000/- leh Citation) 

Pahnihna:  Thingsul Tlangnuam (Rs 3,000/- + Citation) 

Pathumna: Kepran (Rs 2,000/- + Citation)

Heng bakah hian Street Sweeper (Safai Mitra) thawk tha mi 5: Laithangi, Zuangtui; Chawnghmingthanga, Bethlehem; Lalbiaknungi, Tuikual; Zothangpuii, Zonuam leh B. Lalrinkunga, Bungkawn te hnenah chawimawina thilpek hlan a ni bawk.