2053/2025-2026

Lawngtlai, 26th October 2025 : Nimin khan Lai Women Association (LWA) Lawngtlai III, Silver jubilee lawmna Central Young Lai Association (CYLA) Hall - an neih a ni a. Dr. Lorrain Lalpekliana Chinzah, Adviser to Chief Minister ( H&FW, A&FW) leh Lawngtlai East bialtu MLA nibawk chuan khuallian niin a hmanpui.

Dr. Lorrain Lalpekliana Chinzah chuan Silver Jubilee - lawmna hmang tura lo kal khawm zawng zawngte lawmthu hrilhin, Jubilee- lawmna chibai a buk nghal a. Pawl zahawm tak LWA - a lo din theihna tur atana kawng tam taka sulsutu, members - inpe tak tak te, hruaitu fel leh zahawm tak takte hniakhnung zuia, an hmaa chona awmte huai tak leh lungrual taka hlen chhuak zel tura ke pen ho tum zel turin a ngen a. He Ni chhinchhiah tlak tak mai leh hriatreng tawh tur Silver Jubilee hmang tura lo kal khawm LWA members- zahawm tak tak te hian chhungkuaah eizawngtu leh thawktu in nih vang emawin Pasalte hi i zah loh phah lovang u tiin a chah a. Pasal zaha chawimawi thiamte bawk hi hmeichhe fing leh zahawm tia sawi an ni fo a, pasal zah nachang hre lo mi, pasal hmusita ngainep thin mi chu, hna sang leh thiamna sang tak nei ni mi pawh ni se, a thiamna san zawh pauh leh a mualphona pawh a sang zel thin a ni, a ti.

Khuallian chuan Nu fing tehna mawl leh hote chu, Pasalte an zah thiam leh thiam lohah hian a fiah duh thin khawp tiin, mi lehkhathiam tak pawh ni ula, in pasal in chungtlak fo chuan, lehkhathiam mawl nihna a ni mai a, thiamna sang nei lo mi, nu tlawm te pawh i lo ni a ni maithei, mahse pasalte zah thiama tawiawm thiam mi i nih chhung chuan, chu chu nu fing nihna awlsam leh pawimawh ber pakhat a tling a ni, a ti.

LWA members zahawm tak takte chu anmahni bakah an tu leh fa , thang leh thar lo awm zel turte tan tihtur pawimawh tak chhungkaw hrisel, chhungkaw nuam din kawngah an nei tih hre reng turin a chah a ni.

MLA chuan LWA chu Hmeichhiate venghimtu, an zahawmna tungdingtu leh dawmkangtu pawl chauh ni lova, chhungkaw keh chhe tur vengtu, nupui tha zawk nih theihna tura pawl tha ber leh pawimawh ber pakhat a lo nih theihna tura ngaihtuahna zau zawk seng thar zel turin a fuih a. Lairam leh hnam hi a lo dam a, suahsualna leh hlemhletna te a pung zel lohna tur leh ruihhlo lakah thalaite nunna tam tak an liam chhunzawm zel lohna turin LWA pawhin mawhphurhna an nei tih hrechiang turin a chahin Lairam leh Zoram khawvela Pawl chhuanawm ber ni zel turin duhsakna a hlan nghal bawk.

Lai Women Association (LWA) Lawngtlai III, Silver jubilee lawmna inkhawm hi Pi Rosalind Lalrinpuii, Silver jubilee Commitee Memberchuan kaihruaiin, Pi Marina B. Lalrintluangi, Secretary, Silver Jubilee Sub- Committee chuan lawmthu sawina in hun a khar.

Lai Women Association (LWA) Lawngtlai III, hi October Ni 20, 2000 ah din niin, tuna hian Member - 250 an awm mek a,  Silver Jubilee pual hian chawhlui kilhona neih nghal a ni.