2054/2025-2026

Aizawl, the 26th October, 2025 : Mizoram Larsap, General (Dr) Vijay Kumar Singh, PVSM, AVSM, YSM (Retd) chuan tukin khan 'Great Himalayan Connect: Run the Ridge -Connect the Peaks -Unite the Spirit', tih thupui hmanga 'Sikkim Soldierathon 2.0' (Hill Half Marathon) buatsaih chu Paljor Stadium, Gangtok-ah telpuiin, Soldierathon-a tel mi 2,700 te chu a vailiam a ni. He marathon hi 'Fitistan- Ek Fit Bharat', Indian Army Eastern Command leh Trishakti Corps-te tangkawp buatsaih a ni a. He hunah hian Sikkim Larsap Pu Om Prakash Mathur leh mi pawimawh dangte pawh an tel a ni. 

Mizoram Larsap, General (Dr) Vijay Kumar Singh (Retd) chuan sipai leh mipuite inlaichinna tha siam tura Soldierathon buatsaih a ni thin chu lawmawm a tih thu a sawi a. Soldierathon buatsaihtute fakawm tiin, a tel zawng zawngte duhsakna a hlan a ni.

Soldierathon hian Sipai leh mipui, abik takin thalaite inkarah taksa hriselna chawilara inkungkaihna tha zawk siam a tum a. Ram pumah ram tana nunna hlu tak hlantute ngaihhlutna, abikin thalaite'n an chin deuh deuh theih nana hmalak a tum a. Chhum lo chat lova 24x7 chhung ram venhim hna thawktu, inpumkhatna leh ram inrelbawl hran kan nihna vawnhim kawnga hmalatu sipaite ngaihsanna leh chhuanna thinlung mipuiteah tuh a tum a ni. 

Sikkim Soldierathon 2.0 ah hian marathon category 3: 5 Km, 10 Km leh 21 Km te awmin,  Mizoram leh Sikkim Larsap te'n lawmman semin, kum upa leh naupang telte chawimawina an hlan bawk a. He hunah hian hnam inpumkhatna lantir nan hnam lam mawi tak tak entir niin, mipuite'n an hlut hle a ni.