4269/2025-2026

Lawngtlai, 3rd February 2026: Vawiin khan PM Shri Model English School, Lawngtlaiah 'PM Poshan Day' hman a ni a. Dr. Lorrain Lalpekliana Chinzah, Adviser to Chief Minister leh Lawngtlai East bialtu MLA nibawk chuan khuallian niin a hman pui a, Pu Donny Lalruatsanga, Lawngtlai Bawrhsap chu Khualzahawm a ni.

Dr. Lorrain Lalpekliana Chinzah chuan kalkhawmte hnena lawmthu sawina neiin, PM Poshan Day- hman theih a nih chu ropui a tih thu a tarlang a. PM Poshan chu zirlai naupangten eitha an ei theih nan a duan a nih angin, theihtawp chhuah zel a ngai a ni, ti . Zirlai naupangte chu ram leh hnam innghahna a nih angin, tha taka enkawl leh dawmkan hi mitin mawhphurhna a ni, a ti. MLA chuan zirlai naupangte hlut leh pawimawh zia hriatchian zel a pawimawh tiin, a bik takin zirtirtute an mawhphurhna hlen theuh turin a chah a ni.

Khuallian chuan PM Poshan Guidelines - in a phut ang taka zirlai naupangten chaw tha an mamawh pek hi a tulin a pawimawh tak zet tih a tarlang a . Lawngtlai District- chhunga School ten PM Poshan tha taka an kalpui thin chu lawmawm a tih thu a sawi a . Zirlai naupangten ei leh in tha an hmuh zel theih nan sawrkarin theihtawp a chhuah zel tur thu a tarlang. Adviser to Chief Minister chuan Lawngtlai District- chu PM Poshan - kalpui tha ber a nih theih nana theihtawp chhuah turin mawhphurtute a chah nghal bawk a ni.

Khualzahawm Pu Donny Lalruatsanga chuan zirna leh hriselna chu kal kawp tlat a ni a, Lawngtlai mipuiten helamah hian tan lak thar a tul hle a ni, a ti. PM Poshan - mumal taka kalpui a pawimawh tak zet tih tarlangin, naupangte hriselna tura ei leh in tha pek chu tihmakmawh a ni tiin, Official- te thahnem ngai zel turin a chah a. Zirtirtu ten naupang enkawl kawngah hmangaihna nen a enkawl a tul a, kawng dik kawhhmuhtu an nihna hriaa theihtawp chhuah turin zirtirtute a fuih a. Lawngtlai District- in hmasawnna tha zawk a neih theih nana theihtawp chhuahpui turin kalkhawmte a sawm nghal a ni.

Pu H. Sangthanga, DPC, Samagra Shiksha, pawhin thu tawi sawiin, PM Poshan kalpui dan tlangpui sawizauna a nei a . PM Shri School - te chu School tha bik a nih angin, midangte entawn tlak ni zel turin a chah a ni.

Vawiin hun hmannaah hian Zirlai naupang, Zirtirtu, PM Poshan hotute leh Samagra Shiksha hotute an tel thei a, Pu B. Lalchungnunga, Principal, PM Shree Model English School,  chuan lawmthu sawina neiin hun a khar.