4270/2025-2026

Lunglei, 2026 Ramtuk thla ni 3: Lunglei Municipal Council (LMC) ruahmannaa 'Lunglei Ni' hman tur atana Organising Committee chu vawiin khan Lunglei Convention Centre-a LMC BoC Meeting Hall-ah a ṭum ruk nan an ṭhu khawm.

Organising Committee ṭhut khawm hi Chairman, LMC Chief Executive Officer (CEO) Pu Lalhmansanga'n a kaihruai a. LMC Ward No. V Councillor Pi Zonunmawii; Organising Secretary, Sub-Headquarters YMA Secretary Pu Zothanzuala Hnamte leh Assistant Secretary Pu H. Lalhmingthanga te bakah, member-te — sawrkar official, pawl hrang hrang ai awh leh Lungleia mi challangte an tel.

Lunglei Ni 2026 hi Lunglei luah ṭan ni champha, March ni 4, 2026 (Nilaini) chhun lamah C. Ṭhuamluaia Mualah hman tura ruahman a ni a. Vawiin Organising Committee ṭhut khawmah hian Committee peng hrang hrang — Souvenir, Media & Publicity, Ushering & Reception, Refreshment, Event/Activities, Programme, Decoration, Light & Sound, Sanitation leh Traffic & Security committee-te'n hma lakna tur leh sum mamawh tur ruahmanna an theh luhte thlir ho niin, siam rem ngai siam rem a nih hnuah pawm a ni a. Committee peng mawhphurhnaa tel lo, Organising Committee-in a ken tur te pawh sawi ho niin, sum mamawh dan turte thlir ho nghal a ni bawk.

Lunglei Ni hman tur hi a theih ang anga phurpui leh ṭawiawm turin Lunglei khawpui chhunga Local Council leh YMA branch hrang hrangah te, high school, higher secondary school leh college-ah te ngenna leh sawmna lehkha pek ni se, tih a ni a. YMA branch hrang hrang telna "Zaipawlpui" hla sak tur atan Pu H. Lalringa hla phuah, "Leitlangpui A Chul Dawn Lo" tih chu thlan fel a ni a. Khuallian atana Mizoram Chief Minister sawmna lehkha pawh pek a nih tawh thu tar lan niin, zaithiam sawm turte pawh biak ṭan an nih tawh thu tar lan a ni bawk.

Organising Committee hnuaia Event/Activities Committee ruahmannain Lunglei Ni puala intihsiakna hrang hrang buatsaih chhoh ṭan a ni dawn a. He'ng intihsiakna hrang hrangte hi hlutsak tur leh Lunglei Ni hlawhtling taka hman a nih theih nan theih tawpa ṭawiawm leh thawhpui turin Organising Committee chuan Lunglei mipuite an sawm a ni.