730/2024-2025

Champhai, the 8th June, 2024: Adviser to Chief Minister (Technical) Er. H. Ginzalala, Champhai North bialtu MLA ni bawk chuan vawiin khan Circuit House Conference Hall-ah Champhai District chhunga Sawrkar department hotute, NGO hruaitute leh Entrepreneur-te kawmin hmasawnna tur project hrang hrangte a sawipui.

Adviser to CM (Technical) Er. H. Ginzalala chuan kum 5 chhung atana ram rawngbawl tura thlan a ni chu lawmawm tiin, ram leh hnam rawngbawl kawngah Sawrkar hnathawk, NGO leh mipuite tawiawmna a ngen a; tanrualna leh lungrualna nena kan thawhho phawt chuan hma kan sawn thei a ni, a ti a. Sawrkarin line department hrang hrangte inkara thawhhona a ngaihpawimawh thu sawiin, NGO te nena huapzo taka inrawnkhawmna neih chuan rah tha a chhuah ngei a beisei thu a sawi a. Khuarel thil siam leh mawinate ti chhelo zawng leh nakin zela harsatna thlen lo thei ang bera hmasawnna ruhrel siam ngaihpawimawh a tul thu a sawi sawi a. Hmalakna tur project hrang hrang tarlante chu neitu leh mawhphurtu bik awm lo, kan zavaia tanrualna tur a ni, a ti a. Project hrang hrangah intrepreneur-te dah pawimawh an nih dawn thu leh khawtlang mipuite pawh zau zawka rawn tum a nih thu a sawi a. Hmasawnna thlen turin inherdanglam ngam a tul thu leh chin dan tha zawk leh ngaihtuahna thar sen a tul thu a sawi bawk.

He hunah hian Champhai khawpui leh Champhai North bial chhung khaw hrang hranga hmalakna ngaihpawimawh hmasak tur, 'Prioritized Sector for Champhai North (Thumrawn Policy)' chu chhawpchhuaha sawiho niin, Line Department hrang hrangte hmalak theih dan turte ngaihtuahho a ni a. Heng zingah hian Champhai khawpui leh a chhehvel khuate chawmzo thei tur Tuikûal Rain Water Harvesting Project, recreational tourism, eizawnna pe thei tur, thlai chawmna leh pawimawh dangtea hman theih tura ruahmanna siam chungchangte, Elevated Market, Darthangvunga Point-a siam thei tura ruahmanna awmte, Lailiphaia ran chaw Super Napier BXN fodder ching tura hmalaknate bakah Service sector, Secondary sector, Tourism, Animal Husbandry & Fisheries Development, Milk & Milk By-product, Animal Feed Development leh Training & Capacity building program kalpui dan turte sawiho a ni a. He hunah hian Champhai khawpui tan Service sector leh Industry sector-te ngaihpawimawh tum a nih thu leh thingtlang khuaahte a khaw mil zela Agriculture & Allied sector-a hmalak ngaihpawimawh tum a nih thu tarlan a ni.

Vawiin hun hman hi District Bawrhsap Pu James Lalrinchhana chuan kaihruaiin kalkhawmte lawmna thu sawiin inhmelhriattirna hun a hmang a. Pi H. Lalhmachhuani, DDM, NABARD in District Level Sensitisation Workshop on RIDF a nei nghal bawk.

He hunah hian Adviser to CM (Technical) bultumin kumin HSSLC, 2024 result chhuaka Commerce Topper David Lalhminghlua S/o Paul Zakhuma, Champhai Vengthlang hnenah chawimawina Laptop hlan a ni a. Er. H. Ginzalala chuan Champhai District-in HSSLC topper a nei chu lawmawm tiin, zirna kawnga midang kaiharhtu ni zel turin a fuih nghal bawk.