731/2024-2025

Aizawl, the 8th June 2024: Vawiin chawhnu dar 2:00 khan Sports & Youth Services Minister, Pu Lalnghinglova Hmar chuan a office chamber-ah, Mizoram Sports Conclave chungchangah thu thar lakhawmtute a kawm.

He hunah hian Minister chuan Mizoram Sports Conclave – Preparing Mizoram for Olympic Games, 2036 hi June ni 13-14, 2024 ah Baptist Centre, Falkland, Aizawl-a neih turin ruahman a ni tih a sawi. Mizoram Sports Conclave hi National level sports intawhkhawmna niin, Olympics 2036 a Mizo infiammi tam thei ang berin Olympic medal an awrh theihna tura inbuatsaihna hmasa a ni. Mizoram-a National level Sports Conclave hmasa ber tur niin, India ram state zingah Mizoram hi Olympics 2036 vision nei a National level Sports Conclave buatsaih hmasa ber a ni bawk a ni.

Olympics 2036 thlen tumin India a inbuatsaih a, October 14, 2023-a International Olympic Committee (IOC) session-ah khatihlaia Prime Minister Narendra Modi chuan India in Olympics 2036 thlen a tum thu hi a sawi.

India hi khawvela economy lian ber pakhat a ni tawh a, Olympics thleng thei khawpa tha sports infrastructure leh facility a siam thei dawn. Chutihrualin, Olympic level-a hlawhtling tur chuan infrastructure tha ringawt a tawk lo a, heng infrastructure leh facility tha tak taka inel tur infiammi tha neih tel a ngai. Chumi tur chuan tun atangin infiammite hmasawnna (athlete development) ngaihtuah a, hma lak nghal char char a tul tawh a ni.

Sports Minister leh Sports & Youth Services Department-a official te’n Central Sawrkar-ah theihtawp chhuahin hma an la a, Ministry of Youth Affairs & Sports, Department of Sports chuan ‘Mizoram Sports Conclave – Preparing Mizoram for Olympic Games, 2036’ buatsaihna’n ni 27.02.2024 khan Scheme of Human Resources Development in Sports (HRDS) hnuaiah Rs. 68,80,500/- (Cheng nuai sawmruk pariat, singriat leh zanga) a sanction a ni.

Sports Conclave hi March thlaa neih tum phawt a ni a, mahse Lok Sabha inthlan vangin a hun sawn a ni. North East State pathum heng – Assam, Manipur leh Meghalaya Sports Minister te, SAI atangin Director General leh hotu dang te, Indian Olympic Association CEO, Ministry of Youth Affairs and Sports-a Secretary leh Services Sports Control Board (SSCB) Secretary te chu Sports Conclave-a tel thei ngei tura beisei an ni. Tata Trusts, Reliance Foundation Sports, Tata Steel leh Inspire Institute of Sports-a an hotute’n sawmna pawmin an tel thei dawn bawk a ni. India ram chhung leh pawna prominent sportsperson leh journalist te, Olympic sports discipline a Indian Federation/Association hruaitute, Mizo in Olympian kan neih C. Lalremsanga leh Lalremsiami te bakah Mizo infiammi hlawhtling dangte pawh an tel dawn a ni.

Sports Conclave hi Olympic Games-a medal kan hlawh chhuah theihna tura inbuatsaihna a nih angin, medal lak beiseiawm deuhna sports discipline te thlurbing a ni ang. Conclave-ah hian infiammite hmasawnna ngaih pawimawh ber a ni ang a. Sawrkar, private sector, sports federation/association leh khawtlang anga mawhphurhna neih te zirho a, hmalak dan tur ruahmanna siam nghal zel tum a ni.

Infiammite hmasawna tura pawimawh dang, coaching, infrastructure leh facility tha zawk neih theih dan turte pawh ngaih pawimawh a ni ang. Sports Conclave hi Olympic Games 2036 tinzawn chunga neih tur a ni. Hemi huna rilru leh taksa vanglai hmang chho tur, tuna kum 8 leh 15 inkar te sports-a an hmasawnna tur ngaih pawimawh an ni ang.

Mizoram Sports Conclave hi kumdangah pawh neih chhunzawm zel tum a ni a, Mizoram Sports Conclave pual hian website mizoramsportsconclave.com siam a ni. Hemi kaltlang hian Conclave a tel turte in register theih a ni.