1958/2025-2026

Dated Aizawl, the 17th October, 2025: Vawiin khan Dr. K.C. Lalmalsawmzauva, Adviser to Chief Minister (Handholding) & Chairman, Special Investment Committee on Agriculture & Allied Sector (SICA&A) hovin Committee Room, Planning & Programme Implementation Department-ah SICA&A member-te leh department hotute an thukhawm.

He thutkhawmah hian September ni 20, 2025-a Mizoram Sawrkarin M/s Opickpure Organic Pvt. Ltd.-te sawhthing sawngbawlna din tura thuthlung a ziahpui chungchanga hmalakna te, AV Biotech nena thuthlung ziah tum thlirhona leh hemi kaihhnawiha Thenzawl Special Investment Zone-a hmalakna kal mek sawiho a ni.

Commerce & Industries Department aiawhte atangin Khuanglenga Opickpure-te inbunna tur ram leh Thenzawl Special Investment Zone-a AV Biotech-te inbunna tur ram tihfel a nih theih nana hmabakte ngaihthlak a ni a. Meeting chuan kar leh lamah site verification neih ni se tih leh chumi behchhana forest clearance dil ni se, tih a rel a. Khuangleng hmun leh Thenzawl Special Investment Zone-te chu ‘industrial area’-a puan a nih theih nana hma lak chhunzawm rawt a ni bawk.

Thutkhawmah hian SICA&A member-te bakah Commerce & Industries Department, Law & Judicial Department, Land Revenue & Settlement Department, Environment, Forest & Climate Change Department, Agriculture & Farmers’ Welfare Department, Horticulture Department, ZIDCO, leh Planning and Programme Implementation Department hotute an tel a ni.