1959/2025-2026

Dated Aizawl, the 17th October, 2025 : Vawiin khan Assembly Speaker Pu Lalbiakzama chuan Trained Nurses of India, Mizoram State Branch-te Biennial Conference vawi 21-na chu College of Nursing Auditorium, Synod Hospital, Durtlang-ah khuallian niin a hmanpui a. Zoram Medical College & Hospital Nursing Staff te buatsaih lehkhabu ‘Doral Hlimthla Covid-19 Pandemic Experiences’ a tlangzarh bawk a ni.

Khuallian Pu Lalbiakzama chuan nurse-te hi ram leh khawtlang tana hna pawimawh tak tih dam rawngbawl hna thawktu an nih thu sawiin natna khirhkhan tak tawrh chang pawhin nurse-te hi mipuiten an thlamunapui ber an ni a ti a. Tawngkam khat lek pawh damlo te tan damna tling a nih avangin nurse-te chu duat taka damlote enkawl zel turin a chah a. Nurse-te hi ram danga hna thawh kawngah pawh Mizoram tana sulsutu an ni tih sawiin, ram danga hna thawka kal te hian kan ram leh chhungkaw sum leh pai dinhmun chawisang thei khawpin hlawh pawh an nei tha a, Mizoram ti hmingtha a, ti hmingchhe theitu pawh an nih avangain fimkhur lehzuala nun hmang turin a chah a ni.

Vawiin inkhawmah hian Florence Nightingale Awardee Pi V. Lalhmangaihi, TNAI member kum 80 chung lam Conference chhimtute leh TNAI (The Trained Nurses Association of India) member atanga Doctorate degree neite Dr. C. Lalramdini, Asst. Professor, College of Nursing, RIPANS leh Dr. Laltanpuii, Tutor, College of Nursing-te hnenah Speaker chuan chawimawina a hlan a ni.

Trained Nurses’ Association of India, Mizoram State Branch Biennial Conference vawi 21-na inkhawm hi hun hnihah then a ni a, chawhma hunah khan an President Prof. Lalfamkimi’n kalkhawmte lawmna thu a sawi a, Secretary Pi Lalfakawmi Fanai hnen atangin report ngaihthlak a ni. Chawhnu lamah TNAI member thite sunna hun hman a ni a, mithiam bik sawmte paper buatsaih zirho niin rorel inkhawm an nei bawk a ni.