1960/2025-2026

Champhai, dated 17th October 2025: Vawiin khan Champhai District Development Co-ordination and Monitoring Committee (DISHA) chu Chairman, Pu Richard Vanlalhmangaiha, Member of Parliament (Lok Sabha) kaihhruainain DC Conference Hall, Champhaiah an thukhawm.

Lok Sabha MP Pu Richard Vanlalhmangaiha chuan DISHA member te leh sawm bik te an hun hlu tak senga an lo tel avangin lawmthu a sawi a, an hmalakna te a ngaithlain puih theih zel dan tur a ngaihtuah ang tih a sawi bawk. India sawrkar hmathlir Bharat Vikshit 2047 atana India pumpui development a thlirnaah DISHA hi a pawimawh em em, developing atanga developed ni tur chuan district tin hma a sawn a ngaih avangin DISHA atang hian India ram hma kan sawn tan thei a ni tih a sawi. Heng scheme kalpuitu department hotute chu theih tawp chhuah theuh turin a sawm a, thawhhona tha tak a awm chuan Champhai hi an chawisang ngei ang tih a rin thu a sawi bawk.

Vawiin thutkhawmah hian department hrang hrang - Rural Development, FCS&CA, Health & Family Welfare (CMO), PWD, Irrigation & Water Resources, PHE, Agriculture, Education, Commerce & Industries, Animal Husbandry & Veterinary Sciences, Land Resources, Soil & Water Conservation, Fisheries, Social Welfare, Women & Child Development, Land Revenue & Settlement, Horticulture, LAD, UD&PA, Telecommunications (BSNL), Lead Bank, NHIDCL - hnuaia scheme leh programme kalpui mek te department hotute'n an sawifiah a, department hotute'n zawhna te zawtin an chhang bawk. Hmalakna an kalpui dan te, hmachhawp an neih te leh scheme hrang hranga hlawhtlinna an lo neih tawh te an tarlang a ni.

Champhai DISHA thutkhawmah hian Champhai Bawrhsap leh DISHA Member-Secretary ni bawk Pu Mohammad Aaquib, DISHA member te, department hotute, VC member te leh khawtlang hruaitute an tel a ni.

DISHA hi sawrkar laipui hmalakna viltu Committee a nih piah lamah Department hrang hrangte inkarah thawhhona tha siam a, Scheme a hlawhtlin theihna tura thawhho dan kawng tha zawk sial tura din a ni.