3258/2024-2025

Champhai, 28th November 2024: Vawiin khan Adviser to CM, Champhai North bialtu MLA Er. H. Ginzalala buatsaihin Govt. Champhai College Multipurpose Hall-ah Entrepreneurship chungchang inrawnkhawmna neih a. He hunah hian Indian School of Business leh Inquisit Consultants aṭanga lo kal mithiamte leh Champhai District-a zirlaite leh sumdawngte an tel a ni.

Er. H. Ginzalala chuan Indian School of Business leh Inquisit Consultants ten a ngenna ngaipawimawha Champhai an rawn kal thei chu a lawm thu a sawi a. Vawiina an hun hman chuan rah ṭha chhuah ngei se a duh thu sawiin, zirlaite leh sumdawngte chu an hun ṭha neih te hmang ṭangkai turin a chah a, hlawkna chhar ngei turin duhsakna sang ber a hlan a ni.

Champhai North bialtu MLA chuan ram dinchhuah nan ngaihtuahna leh thil thar thlen a pawimawh tih sawiin, Indian School of Business te nen ṭangkawpa Entrepreneur-te puitu tur ‘Innovation Hub’ din tumin ngaihtuahna an seng mek tih a tarlang a. Thil lian tham chu ropuiin lang mah se, a pawimawh ber erawh engmah lo aṭanga bul ṭan hi a ni tih hre reng turin kalkhawmte chu a chah bawk a ni.

He hunah hian Pu Suresh Krishna Bandi, Indian School of Business chuan Start-Up leh Enterpreneur hrang hrang te an lo puih tawh ṭhin dan te sawiin, Champhai District-a hetiang lam tui mi te pui turin an inhuam reng tih a sawi bawk. Zirlai leh sumdawng kalkhawmte zawhna hrang hrang te chhangin, hun hlawk thlak tak an hmang a ni.

Inkhawm hi Champhai Bawrhsap Pu VL Remliana chuan kaihruaiin, inhmelhriattirna hun hmangin, inlawmna thu a sawi a. Dr. Tuna Rout, Inquisit Consultants leh Pu Animesh Patra, ISB te pawhin he hun hi an hman pui a ni.