1624/2024-2025

Champhai, 16th August, 2024: Adviser to Chief Minister (Technical), Er. H. Ginzalala, Champhai North bialtu ni bawk kaihhruaiin vawiin khan Champhai DC Conference Hall-ah Champhai District chhunga sawrkar department hotute an thukhawm a. Champhai District tana sawrkar hmalakna kal lai te, hmachhawp leh hmathlir hrang hrang te an sawiho.

Er. H. Ginzalala chuan Champhai District chhunga department hotute nen inhmelhriatna hun tha neih a, an harsatna leh an hmathlirte hriat sak a duh thu a sawi a. Mipuite tan hlawk leh zuala sawrkarin hna a thawh theih nan thawhhona tha neih a tul thu a sawi bawk. Adviser to Chief Minister hian Champhai khawpui leh District tana a hmathlir hrang hrang - Champhai-Khawzawl inkara Road-Side Market din te, Spoil Bank mumal tak din te, Artificial Intelligence hman tangkai dan tur te, Tuikual lui khuah te leh Darthangvunga Point-a Elevated Market siam tum chungchang te a sawifiah a. Sawrkar Department hotute hnen atangin an hmalakna, hmachhawp leh an mamawh te a ngaihthlak sak bawk a ni.

He hunah hian Champhai Bawrhsap Pu VL Remliana pawhin thu sawiin, nasa zawka ruihhlo do a tul thu te, zirna kawnga hmasawn a tul thu te, sumdawnna piah lam eizawnna ngelnghet dang ngaihtuah tula a hriat thu te leh Khankawn atanga Champhai khawpui panna kawng laih zauh tul a tih thu te a sawi a ni.

Vawiin thutkhawmah hian Champhai District chhunga Department hrang hrang - DFO, DAO, DUDO, RD, PWD, P&E, PHE, CMO, LRS&WC, I&WR, Sericulture, DTO leh LR&S hotute an tel a ni.