1623/2024-2025

Aizawl, the 16th August, 2024: Mission LiFE (Lifestyle for Environment) programme hnuaia hmalâkna pakhat atân ‘Ek Ped Maa Ke Naam - Plant 4 Mother’ campaign pualin vawiin khân Mizoram Pollution Control Board (MPCB) leh Durtlang Branch YMA tangkawpte chuan Bung mual thlânmual, Durtlangah thing phun rûnpui an buatsaih.

Thing phun rûnpuiah hian thing tiak 110 zet phun niin MPCB-a thawktute leh Durtlang Branch YMA member thahnem tak an thawk chhuak a ni. Thing phunna tur hmun hmâ tha tak lo buatsaihtu Durtlang Branch YMA-te chungah leh thing phun tura rawn thawk chhuak zawng zawngte chungah MPCB hotute chuan lâwmthu an sawi.

Plant 4 Mother hnuaiah hian thing phun rûnpui hi State hrang hrangah kalpui mêk niin MPCB paw’n Mizoramah kumin chhûng hian a tam thei ang ber thing phun a nih theih nân theihtâwp an chhuah a, thing tiakte semin Mizorama Sikul leh College Eco Club hrang hrangte thing phun turin an ngên a, thing phun report leh thlalâkte hi thahnem tak a lût khâwm tawh a, Central lamah Portal kal tlangin MPCB hian an thawn zêl a ni. Pâwl, mimal leh department hrang hrangte MPCB chuan thing phun turin an sâwm a ni.

‘Ek Ped Maa Ke Naam – Plant 4 Mother’ campaign hi Prime Minister Pu Narendra Modi-a’n kumin June ni 5, World Environment Day khân a hawng a, he campaign-ah hian India ram mipui zawng zawngte chu mahni nute puala thing tiak pakhat theuh tal phun turin Prime Minister hian a sâwm a ni.

Vawiin vek khan Mizoram EIACP Hub pawhin  Sericulture Department-te nen tangkawpin silk pangang thing chi hrang hrang 50 vêl phunin an hnatlâng bawk.

Mission LiFE programme hi ‘Environment’ humhalh leh humhim pawimawhzia inzirtirna leh chumi kawnga mi tinin ke kan pên theih dân tur inkawh hmuhna a ni a, mimal leh khawtlâng anga kan nitin nunphung leh nun dânte, kan chhehvêl leilung nena inhne rem tura inthlâk danglam tura inzirtirna leh inkaihhruaina a ni.