1622/2024-2025

2024 Thlazing ni 16: Vawiin chawhma khan Lunglei Municipal Council (LMC) Board of Council Hall, Convention Centre, Lungleiah LMC Vice Chairman Pu K. Lalrinawma kaihhruaiin LMC huam chhunga lirthei dahna garage nei lote lirthei dah dan tur (parking) chungchanga Local Council-te'n ruahmanna an siam dante thlir ho niin, hma lak zui dan tur sawi ho a ni.

LMC Vice Chairman Pu K. Lalrinawma chuan LMC area chhunga kawngpuite a lo thawl zawk theih nan leh mipuite an lo him zawk theih nan te, kawng kama lirthei dah avanga lirthei chetsualna awm ṭhin a lo ziaawm theih nan te LMC leh Local Council-te chuan traffic management chungchangah thawh dunna thuthlung ziah a nih angin Local Council-te'n mahni huam chhunga ruahmanna an siam dante sawi ho a ṭul thu a sawi a. Mipui tan ruahmanna ṭha zawk a awm theih nan ngaihtuahna sen tlan ṭha a tih thu a sawi.

LMC Chief Executive Officer Pu Donny Lalruatsanga chuan LMC leh Local Council-te'n thawh dunna thuthlung an lo ziah tawh angin garage nei lote chu September 2024 aṭanga parking fee khawn a ni tawh dawn tih sawiin, Pukpui-Hrangchalkawn-Zobawk kawngpui (main road) bikah LMC-in private parking area a lo puan tawh bak zawng, commercial vehicle stand-te leh garage neih loh avanga kawngpui kama lirthei dah ṭhinte huamin parking fee khawn tawh tur a nih thu a sawi a. LMC-in lirthei hun phal lohna hmun (no parking area)-a a puan tawh hmuna lirthei hunte chu chawitir (fine) an ni dawn tih sawiin, hei hi Local Council-te'n an bawhzui dawn thu leh main road bakah District road leh veng chhung internal road-te a huam vek tur thu a sawi a. Main road-a parking zone (safe zone)-ah leh internal road-ah mimal lirthei dah duhte chu dahtir niin, Local Council-te'n parking fee an khawn tur thu sawiin, LMC phalna tel lova zankhuaa lirthei riah ṭhin (overnight parking) motor lian chite chu chawitir an nih tur thu a sawi bawk.

Garage nei lo parking chungchang sawi honaah hian Local Council-te'n an veng chhung ṭheuhva ruahmanna an siam dante tar langin, veng chhung hmunhma neih dan leh kawng (internal road) dinhmunin a zir loh avanga Local Council ṭhenkhatte'n ruahmanna siam kawnga harsatna an tawh dan te pawh tar lan a ni a. Ruahmanna felfai zawk a awm theih nana rawtna hrang hrangte sawi ho niin, LMC leh Local Council-te thawh dunna thuthlung awm sa anga September 2024 aṭanga khauh taka kalpui a nih theih nan hmabak awmte pawh chak taka bawhzui ni se, tih a ni.