794/2024-2025

Champhai, the 13th June, 2024: MZP Hqrs. Champhai buatsaiha vawiin chawhma dar 10:30 a zirlai tithate chawimawina hun Govt. Champhai Multipurpose Hall-a hman chu Adviser to Chief Minister (Technical) Er. H. Ginzalala, Champhai North bialtu MLA chuan khuallian niin a hmanpui. He hunah hian District Bawrhsap Pu James Lalrinchhana, Chairman, District Education Committee chu khualzahawm a ni.

Khuallian Adviser to CM (Technical) Er. H. Ginzalala chuan zirlai hlawhtlinna changte thinlung taka a lawmpui thu sawiin, ram tana rohlu, khua leh tui tha nih tum turin a fuih a. Nu leh pate thu awiha chawimawi thinte malsawmnain a umzui thin thu sawiin, zirlaite chu anmahni enkawltu nu leh pate zaha Pathian tih chunga lehkha zir tur leh zirtirtute thu awih turin a chah a. Hun leh sum hmang dik thinte chu mipuitling an nih thu sawiin, hun tha an neihte bawhpelh lova renchem taka sum leh pai   hman tum turin zirlaite a chah a. Kalkhawmte chu rilru dik neia nun hmang uluk tura chahin, ruihhlo leh a kaihhnawih bakah nunphung hrisel lo laka inthiar fihlim turin a fuih bawk. 

Champhai North bialtu MLA Er. H. Ginzalala chuan zirlaite chu taksa leh rilru hriselna ngaipawimawh tur leh harsatna an tawh chang pawhin ngaihtuahna fim hmang lova thutawp siam mai lo turin a fuih a. Hlawhtlinna leh ropuinate chu pass percentage leh sum leh pai ngah lamah chauh teh lova, thiamna tak tak leh nundan kawng dikah teh zawk turin a chah bawk a. Sawrkar hmachhawpte tarlangin, sawrkarin entrepreneurship a ngaipawimawh thu leh Champhaiah hetiang lam hawi training buatsaih tum a nih thu a sawi a. An hmazawna tihtur leh harsatna awmte thiam taka hmachhawn zel turin a fuih a, an harsatnate sawrkarin a bawhzui zel dawn thu sawiin an kalzelna turah duhsakna a hlan a ni.

Khualzahawm District Bawrhsap Pu James Lalrinchhana chuan eng hna pawh thawk thei turin thiamna tak tak neih a pawimawh thu sawiin, Champhai District tan hmasawnna dangte ngaihthah chuang lovin zirna, hriselna leh infiamnate ngaihpawimawh a ni, a ti a. Taima taka lehkha zir te'n hlawhtlinna hmangin nu leh pate an chawimawi thin tih sawiin, zirlai kalkhawmte chu nu leh pate chawimawi chhunzawm zel turin a fuih a. Tum mumal tak nei tur leh tihlawhtling tura theihtawp chhuah turin a fuih a. Zirlai hlawhtlinna changte a lawmpui rualin tuna hlawhtlinna chang ta chiah lote pawh an hlawhchhamna chu hmasawnna tura kailawnah hmang turin a fuih a. Zirlai kalkhawmte an kalzelna turah duhsakna a hlan a, hlawhtlinna dangte chang thei tura theihtawp chhuah chhunzawm zel turin a fuih nghal bawk.

He hunah hian Champhai khawpui chhunga zirna in hrang hrang atanga HSLC Distinction-a pass-te, HSSLC Distinction leh First Division-a pass-te chawimawina hun hman niin, HSLC exam a titha zirlai 59 (Distinction) leh HSSLC exam-a titha zirlai 85 (Distinction 6 leh First Division 79), avaiin zirlai 144 te chawimawina thuziak hlan an ni a, heng bakah hian pass kim vek School 2, King Solomon's School leh PES Zotlang te chawimawina thuziak cheimawi hlan an ni bawk.

He hun hi Lalpianpuia, Vice President, MZP Hqrs. Champhai chuan kaihruaiin Rev. K. Lalthlamuana'n hunserh a hmang a. Ralte Zodingliana, Secretary, MZP Hqrs. Champhai hnen atangin report ngaihthlak a ni a. Chinkhanmanga Thomte, General Secretary, MZP General Hqrs. Aizawl leh H. Lalruatdika, President, MZP Hqrs. Champhai te'n fuihna thu an sawi a. Vanlalrinkima, Finance Secretary, MZP Hqrs. Champhaiin lawmthu sawiin hun hman a khar a ni.