795/2024-2025

Aizawl, the 13^th June 2024 : Fisheries enkawltu Minister Pu Lalthansanga’n vawiin khan I & PR Auditorium ah Mizoram Cooperative Fish Farming Marketing and Processing Federation Ltd. (ZOFISFED) inkhawmpui General Assembly vawi 20-na a hmanpui. Fisheries Department Director Pi Laltleipuii pawhin he hun hi telpui a ni.

Fisheries Minister Pu Lalthansanga chuan ZOFISFED in mit lova kum 30 chuang sangha khawitute tan Department nen thawk hova, kuthnathawktute dinhmun chawisanna lama an hnathawh chu chhuanawm a tih thusawiin an kalzelna turah tha nia a hriat te a sawilang a ni. Mizoramin sangha tharchhuah kawnga leh hemi a intodelhna atan hma lakna tur tam tak ala awm thu te sawiin Central Sawrkar chuan hemi lamah te pawh an sum ruahman te a tipung chho mek a, hengte hi kan tangkaipui ngei thei nan a lo dawnsawn dana kan inpuahchah a ngai a ni, a ti.

Sawrkar thar programme - Handholding Programme(Policy) chungchang sawiin he ruahmanna hnuaia sawrkarin a thawhpui turte leh a puih turte chu beneficiaries te ti tawh lovin Progressive leh Business Partner kan ti tawh a, heng kan thlanna kawnga chuan politics induhsakna a awm thiang dawn lova, a hlawhtlin pui ngei turte chu induhsaksna awm lovin free leh fair tawkin thlan a ni dawn a ni, a ti. Sawrkar thar chuan project reng reng chu nakina zela a hmantlak dawn em, a hman zui thei dawn em, Sawrkar tan phurrit a ni thei em tih te chu a ngaihpawimawh ber tur a nih thu sawiin project reng reng chu Planning Department a kaltlanga a ngai dawn a, chutiang turin project siamtu leh buaipuitute pawhin an ngaihtuahna an her rem a tul hle a ti.

Vawiina General Assembly hi ZOFISFED Chairman Pu C. T. Sanga’n kaihruaiin, an Pawl Annual Report chu Dr. O.P. Singh, Managing Director in a sawi a, Board of Directors atangin Pu Rothangpuia’n thu a sawi bawk a ni.

ZOFISFED hi kum 1998 khan din tunah hian an hnuaia Affiliated Primary Fishery Society 43 an awm mek a ni.