763/2024-2025

Champhai, the 11th June, 2024: Champhai District-a cham mek Adviser to Chief Minister (Technical) Er. H. Ginzalala, Champhai North bialtu MLA chuan vawiin khan Champhai khawpui leh a chhehvela hmunhma pawimawh tak takte tlawhin a enfiah.

Adviser to CM (Technical) Er. H. Ginzalala chuan vawiin chawhma dar 10:00 khan AH &Vety. Complex, Champhai Vengsang tlawhin Dr. B. Lallawmsanga, District A.H& Vety. Officer (DAH&VO) Champhai leh a thawhpuite'n lo dawngsawngin hmalakna an lo hrilhfiah a. Adviser to CM hian Super Napier tiak a phun bakah District Milk Producers’ Co-operative Union Limited (CHAMUL) hmunhma tlawhin hmanraw neihte a enfiah nghal bawk.

Adviser to CM (Technical) chuan Champhai District-ah bawnghnute leh sa a intodelh turin ran chaw mamawh khawp thar chhuah a ngaih thu sawiin, hemi atan hian Champhai District-ah ran chaw Super Napier ching turin chak taka hmalak a ni, a ti a. Vety. Department chu sum leh pai lakluhna atana pawimawh tak, mitin huapzo leh thlengpha a nih thu a sawi a. Ran vulh leh ran chaw intodelh tura tulte mipui hnena zirtirna pek kawngah tanlak a tul thu sawiin, thawktute chu sawrkar hmalakna phur taka tawiawm zel turin a sawm a. District Cooperative Development Committee (DCDC) hmalaknaa CHAMUL tharthawh leh dan tur chungchang bawhzui a ni chu lawmawm a tih thu a sawi bawk.

Vawiin chawhnu khan Adviser to CM (Technical) Er. H. Ginzalala chuan Hringlangtlang a tlawh a,  Hringlangtlang Society hotute'n lo dawngsawngin tihchangtlun kawnga tul leh pawimawhte an lo thlen a ni.

He hunah hian Er. H. Ginzalala chuan pipu sulhnu hrang hrangte chu a hlui poh leh a hlut tawlh tawlh thu sawiin, pipu sulhnute hlutna chang kan hriat deuh deuh a tul tih a sawi a. Pipu sulhnu tamna Champhai District chu tourism chawilar nana hmunhma pawimawh tak a nih vangin hemi lam hawi hian kan inpuahchah nasat a ngai hle a ni, a ti bawk.

Thusawitu dang Champhai District Bawrhsap Pu James Lalrinchhana chuan Champhai District chakna chu tourism sector a ni, a ti a. Pipu sulhnu tamna ber district, sik leh sa nuam, hmunhma mawi, inkalpawhna kawng tha, ramri depa awm a nihnate chuan tourism chawilar kawngah nasa taka a puih dawn thu a sawi a. Tourism industry-a Mizoram hmahruai ni thei tura lo inpuahchah lawk erawh a tul thu sawiin, khualchhawn kawngah pawh zau zawka inzirtirna kan kalpui a ngai a ni, a ti bawk.

Adviser to CM (Technical) hian vawiin tlai khan ITI, Champhai Zote Refugee Camp tlawhin Pu Robert Zoremtluanga, Chairman, Refugee Sub-Committee, Sub-Hqrs. YMA Champhaiin lo dawngsawngin raltlan chhawmdawl kawnga hmalak dante a lo hrilhfiah a. Tun dinhmunah ITI Zoteah hian raltlan mi 333 an awm mek a ni.

Raltlante kawma hun a hmannaah Er. H. Ginzalala chuan an tan liau liau High Power Committee on Myanmar and Bangladesh Refugees din a nih thu leh an harsatnate a ngaihtuah reng thu sawiin, heng bakah hian District Level Committee pawh din a nih thu leh a tul angte an buaipui zel thu a sawi a; harsatna an neihte thuneitute hnena thlen zel turin a chah nghal bawk.

Thusawitu dang District Bawrhsap Pu James Lalrinchhana chuan raltlante chu ram dante tha taka zawm turin a chah a. Ralmuang taka awm tur leh thlaphang lo turin a chah nghal bawk.