762/2024-2025

Aizawl, the 11th June 2024: Vawiin chawhnu khan ATI Traning Hall No 2-ah Foundation Training for Combined Civil Services Probationer,  2023 Batch hawnna neih a ni a. He hun hi DP&AR Minister Pu K.Sapdanga, Home Minister ni bawk chuan Khuallian niin a hawng a ni.

DP&AR Minister chuan officer thar te chu Mizoram sawrkar tinghettu, sawrkar innghahna, a thir ruhrel an ni tih a sawi a. Service Association hotute atanga fuihna thu an dawn te zawm theih tura chahin, officer thar te chu  an hnathawh te an rawngbawlna angah ngai turin a fuih a ni.

Transfer and posting chungchang sawiin sawrkarin officer te chu  hman tangkaina turah a transfer thei an tih a sawi a. Transfer sutlet tura insawipui hi sim a tha a, sawrkar hotuten transfer & posting a siam reng reng chu a thaber tur ruahmanna nena a siam thin a nih avangin thuawih taka kan zawm tlan a tha ber ang a ti.

Officer thar te chu mawhphurhna sang tak  hre tur leh sawrkar hnathawkte phuartu Danin a phal leh phalloh te chiang taka  hria a zawm turin a chah bawk.

DP&AR Commissioner & Secretary Pu K. Lalthawmmawia chuan kum rei tak chhung sawrkar hna a lo thawh tawhna atanga a thil tawn leh hriat te, officer thar te tana tangkai tur tak tak te hmangin fuihna thu a sawi bakah officer te tana tihtur te leh mawhphurhna pawimawh tak tak te a sawi a ni.

Tuntum hian, MCS 10, MIS 5 leh MF&AS 12 ten Foundation Training hi an neiho dawn a. A vawikhatna atan trainee te hi ATI Hostel-ah an training chhung an awm nghal dawn a ni.

Combined Services a tel service 4 aiawh in an pawl hruaitute'n officer thar te fuihna thu an sawi a. MCSA aiawhin President Pu V. Lalengmawia, MPSA aiawhin President Pu Zosangliana, MISA aiawhin President Pu Malsawmsanga leh MFASA aiawhin Vice President Pu Laldinpuia ten officer thar te tana thu an sawi a ni.

Foundation Training of Combined Civil  Services, 2023 Batch hawnna program hi Pi Maria CT Zuali, Director, ATI in a kaihruai a. Pu Mark Lalthanliana, Joint Director leh Course Director ni bawk chuan Lawmthu sawiin Training hawnna hi a khar a ni.