761/2024-2025

2024 Nikir thla ni 11: Mizorama kum tina June ni 11-a hman ṭhin Green Mizoram Day chu Lawngtlaiah pawh vawiin khan hman a ni a. He ni pual hian Lawngtlaia sawrkar department hrang hrang, zirna in, District MJA leh tlawmngai pawl te chuan Kaladan Multi Modal Transit Transport Project (KMMTTP) kawngpui sir, Lawngtlai aṭanga kilometre 14 vela hlaah inzar pharhin thing ṭiak 342 an phun a ni.

Chawhma dar 10:30-ah Lawngtlai Bawrhsap pisa tualah hawnna inkhawm buatsaih niin, Lawngtlai Additional Deputy Commissioner Pi B. Malsawmtluangi chu Khuallian a ni a. Khuallian chuan Mizoram sik leh sa leh boruak nuam tak ni ṭhin chu ramngaw kan tihchereu nasat avangin a chhe zawngin a danglam chak hle tih sawiin, thing leh mau leh nungcha humhalhna kawngah nasa zawka ṭan lak a ṭul hle tih a sawi a. Mizorama kan lo neih dan leh kangmei chhuak ṭhin chu ramngaw tichereu chaktu ber a nih thu sawiin, lo neih leh hal chungchangah te, a hal hun thu-ah te fimkhur leh dan zawm a pawimawh thu a sawi a. Tuna khawvel luah mekte hian kan thlah lo awm zel turte tan khawvel hi lo enkawl tur kan ni tiin, District mipuite chu ramngaw humhalh leh siam belh a, enkawl zui kawngah te ṭan la zel turin a chah a ni.

Kumin Green Mizoram Day thupuiah hian "I nunna atan thing phun rawh" (Plant trees for your life) tih chu hman a ni a. Green Mizoram Day puala inkhawm tawi buatsaih hi Chhimtuipui Wildlife Division-a Deputy Conservator of Forests Dr R. Lalruatfela chuan a kaihruai a. LADC-a District Council Conservator of Forests (DCCF), District Level Committee on Green Mizoram-a Member Secretary ni bawk Pu K. Lalromawia chuan Lawngtlaia Green Mizoram Day hman tawh dan report pein, hriat tur pawimawh a tar lang a. Kangmei ven kawnga thawk ṭha khua chawimawina 'Village Level Fire Prevention Award 2024' dawngtu khuate hnenah Khuallian chuan lawmman a hlan bawk.

Lawngtlai District Village Level Fire Prevention Award 2024 lawmman pakhatna hi Rawlbuk khuain an dawng a; pahnihna chu Mampui niin, Mualbu 'L' chu pathumna an ni a. Lawmmanah hian thuziak leh pawisa fai - 1-na ₹ 50,000/-, 2-na ₹ 30,000/- leh 3-na ₹ 20,000/- te hlan an ni.
Hawnna hun hman zawh hian ceremonial planting buatsaih niin, Khuallian leh Additional Superintendent of Police te'n thing ṭiak pakhat ve ve an phun a. Hemi hnu hian Nodal department, LADC-a Environment, Forests & Climate Change (EF&CC) Department lamin department hrang hrangte thing phunna tur hmun an ruahman saah thing phun tur leh a hungna tur an lo chhawp lawk angin department hrang hrangte chuan thing hi phunin, he'ng an thing phunte hi ṭha takin an hung nghal bawk a ni.

Green Mizoram Day hi a tirah chuan "Green Aizawl" tiin kum 1998 khan Aizawlah hman ṭan a ni a. Kum 1999 aṭangin "Green Mizoram" tih hming chawiin ram pumah hman a ni. Lawngtlai District bikah chuan kum 2000 aṭang khan hman ṭan niin, kum tin hman a ni a. Kum hmasa lam eng emaw ti chhung kha Green Mizoram Day hian Lawngtlai leh Mampui inkar kawngpui dungah thing phun ṭhin a ni a. Kum 2022 aṭang khan KMMTTP kawngpui dungah thing hi phun a ni ve ta thung a. Nikum khan thing ṭiak 380 phun niin, lei min leh leivung tawlhin a tihchhiat a awm nual avangin 57% vel a nung a. LADC EF&CC Department chuan Green Mizoram Day-a thing phunte hi enkawl chhunzawmin, a nung lo leh a chhiate chu a theih ang angin an thlak ṭhin a ni.