760/2024-2025

2024 Nikir thla ni 11: Vawiin zing dar 9:30 khan Mizoram State Election Commissioner Pu Laima Chozah chuan Lawngtlai DC Conference Hall-ah Lai Autonomous District Council (LADC) hnuaia Village Council Inthlanpui, 2024 leh 12-Lawngtlai Chandmary MDC Constituency-a by-election neih hun atan June ni 27, 2024 ruat a nih thu a puang.

State Election Commissioner Pu Laima Chozah chuan India ram chu mipui rorelna ram (democracy) a nih angin rorelna chhawng hrang hrangah inthlan buatsaih ṭhin a ni tiin, Mizoramah kum 2008 aṭangin State Election Commission-in inthlan buatsaihin, mipuite ṭawiawmna avangin inthlan hlawhtling tak buatsaih ṭhin a ni, a ti a. Tun ṭuma LADC hnuaia VC Inthlanpui leh Lawngtlai Chandmary bial MDC by-election pawh official-te, NGO, MJA, political party leh mipuite thawhpuina leh ṭawiawmna azarah thianghlim, felfai, muanawm leh hlawhtling taka buatsaih a nih leh ngei a beisei thu a sawi.

Pu Laima Chozah chuan mipui rorelna chu hruaitu hmasate'n nasa taka an beihna rah chhuah a nih thu sawiin, a bik takin 6th Schedule huam chhung, Lawngtlai District leh Siaha District-a mite tan District Council thuneihna leh mahnia inawpna an neih bik chu hlut thiam pawimawh a tih thu a sawi a. 6th Schedule fundamental pawimawh tak chu 'kan chenna ram kan enkawl tur a ni' tih a ni a, ram inpek dan leh cheibawl dan dika kan ram kan humhalh a pawimawh a ni, a ti a. Hnamin tih dan phung customary law a neihte vawn nun tlat a, hnam ṭawng leh ziarang humhalh leh zirna ngaih pawimawh te chu ram leh hnam humhalh nan a pawimawh a ni, a ti.State Election Commissioner chuan inthlan puan a nih tak avangin LADC huam chhungah Model Code of Conduct (MCC) hman ṭan nghal a nih thu sawiin, official-te, political party-te leh mipuite chu MCC inkaihhruainate ṭha taka zawm turin a ngen a. Inthlannaah sum hmanga tlin tumna rilru pu lo turin party-te leh candidate-te chahin, harsatna an neihte chu SEC leh official-te hnenah thlen ṭhin turin a chah a. SEC chuan ṭan lam an neih dawn loh thu sawiin, dan ang zela an kal tur thu leh dik taka inthlan kalpui a nih tur thu a sawi a ni.

He hunah hian SEC leh District election official-te bakah, MJA member-te, tlawmngai pawl hruaitute leh political party ai awhte an tel a. Mizoram SEC Secretary Pu K. Laldingliana chuan hun kaihruaiin, Lawngtlai District Election Office ai awhin Deputy DEO Pi B. Malsawmtluangi'n thu a sawi a. Inthlan buatsaih tur chungchanga zawhna leh chhanna leh sawi hona hun hman niin, SEC Deputy Secretary Pu R. Vanrengpuia chuan lawm thu sawiin hun a khar a ni.

Lai Autonmous District Council (LADC) hnuaia Village Council (VC) term chu a lo tawp tak avangin State Election Commission, Mizoram chuan India Danpui Article 243K leh Lai Autonomous District Council (Election to Village Council) Rules, 2011 Rule 3 sub-rule (5) tlawh chhanin LADC hnuaia VC 99 (sawmkua pakua) atan inthlanpui chu June ni 27, 2024 (Ningani) khian buatsaih turin a ruahman a. VC 99-ah hian general seat 496 leh reserved (hmeichhe tan bik) seat 99, a zavaiin seat 595 a awm dawn a ni.

Heti ang hian General Election to Village Council under Lai Autonomous District Council, 2024 -Schedule of Election chu siam a ni:

1. Announcement of Schedule of Election by State Election Commission, Mizoram & Returning Officer - 11.06.2024 (Tuesday)

2. Last Date for Filling of Nomination - 18.06.2024 (Tuesday) (11:00 AM - 3:00 PM)

3. Scrutiny of Nominations     - 19.06.2024 (Wednesday) (after 3:00 PM)

4. Last date for withdrawal of Candidature    - 21.06.2024 (Friday) (till 1:00 PM)

5. Allotment of Symbols & Display of Contesting Candidates - 21.06.2024 (Friday) (1:00 PM onwards)

6. Poll Date - 27.06.2024 (Thursday) (7:00 AM - 5:00 PM)

7. Counting of Votes - 27.06.2024 (Thursday) (Counting of votes shall commence as soon as poll is over)

8. Re-Poll (if necessary) - 28.06.2024 (Friday) (7:00 AM - 5:00 PM)

9. Counting of Re-Polled Votes (if any) - 28.06.2024 (Friday)(Counting of votes shall commence as soon as poll is over)

10.  Date by which Election process shall be completed - 05.07.2024 (Friday)

LADC hnuaia 12-Lawngtlai Chandmary MDC Constituency-a MDC Seat ruak hnawh khat turin State Election Commission, Mizoram chuan Lai Autonomous District Council (Constitution, Conduct of Business, etc.) Rules, 2010 sub-rule (4) of Rule 10 leh sub-rule (3) (a) of Rule 142 tlawh chhanin June ni 27, 2024 (Ningani) vek khian inthlan buatsaih turin a ruahman bawk a ni.

Heti ang hian By Election to 12-Lawngtlai Chandmary MDC Constituecy Under Lai Autonomous District Council, 2024 - Schedule of Election chu siam a ni:

1. Announcement of Schedule of Election by State Election Commission, Mizoram & Returning Officer - 11.06.2024 (Tuesday)

2. Last Date for Filling of Nomination - 18.06.2024 (Tuesday) (11:00 AM - 3:00 PM)

3. Scrutiny of Nominations     - 19.06.2024 (Wednesday) (after 3:00 P.M)

4. Last date for withdrawal of Candidature - 21.06.2024 (Friday) (till 1:00 PM)

5. Allotment of Symbols & Display of Contesting    Candidates - 21.06.2024 (Friday) (1:00 PM onwards)

6. Poll Date - 27.06.2024 (Thursday) (7:00 AM - 5:00 PM)

7. Counting of Votes - 01.07.2024 (Monday) (10:00 AM onwards)

8. Re-Poll (if necessary) - 28.06.2024 (Friday) (7:00 AM - 5:00 PM)

9. Date by which Election process shall be completed - 05.07.2024 (Friday)

State Election Commission, Mizoram chuan inthlanna him, felfai leh muanawm tak kan neih theih nan inthlanna buaipuitu, Political Party te, Media te, NGO te leh mipui ṭawiawmna a ngen a. Mipui duhthlanna kal tlanga tualchhung inrelbawlna ṭha tak kan neih theih nana theih tawp chhuah ṭheuh turin mi tinte a sawm a. Ni 27 June, 2024 hian Lai Autonomous Disrict Council area chhunga mipui vote nei zawng zawngte chu vote thlak ṭheuh turin a sawm a ni.