759/2024-2025

Kolasib dated 11th June 2024: Vawiin chawhma khan Kolasib District Level Committee on Green Mizoram Day 2024-in a lo rel tawh angin 1st IR Bn Headquarters, Mualvumah ‘I nunna atan thing phun rawh’ tih thupui hmangin ‘Green Mizoram Day 2024’ pual a hun hman a ni a. Deputy Speaker Pu Lalfamkima, Kolasib Assembly Constituency bialtu MLA chu khuallian niin Pu John LT Sanga, Deputy Commissioner, Pu David H.Thangliana, SP, District Office hrang hrang a hotute, tlawmngai pawl leh khawtlang hruaitute leh zirlai naupangte he hun ah hian an tel a ni.

Deputy Speaker Pu Lalfamkima chuan khawvel chenna tlak, tui leh boruak thianghlim hnianghnar awmna a siam tur chuan ram leilung hausakna humhalh a pawimawh thu sawiin a chhung a chengte chu humhalh hna thawk tur a mi pawimawh ber te an nih thu a sawi. Ram ngaw humhalh chu mi tin mawhphurhna a nih thu Pu Lalfamkima chuan sawiin mihring, nungchate leh ram ngaw te chu inmamawhtawn vek an nih thu a sawi a. Leilung hausakna humhalh kawng ah hmalakna awmze nei leh inbuktawk kalpui thin a pawimawh thu a sawi bawk a ni.

Deputy Speaker chuan thing phun chu ram ngaw humhalhna kawng a hmanrua pawimawh tak a nih bak ah tui hna humhalh nan pawh a hmalakna tangkai tak a nih thu a tarlang a. Green Mizoram Day pual a thing phun chu duhtawk mai lovin kan thing phun te an puitlin theih nana vil zui chu mawhphurhna pawimawh tak a nih tel bawk thu a sawi.

Pu John LT Sanga, Deputy Commissioner chuan kalkhawmte lawmna thu sawiin Green Mizoram Day 2024 pual a hun hmanna chuan mihring dam khaw chhuah nan thing leh mau leh nungchate pawimawh zia hriat tharna a thlen ngei a beisei thu a sawi a. Ram ngaw humhalh kawng a hma latu pawimawh tak nih tum theuh turin kalkhawmte a fuih bawk a ni.

Mualvum a Green Mizoram Day 2024 pual a hun hmanna hi Pu John LT Sanga, Deputy Commissioner-in a kaihruai a, Pi Smilna Sudhakar, DFO-in Green Mizoram Day pual a hmalakna kalpui thin a nih dan tarlanna hun a hmang a. Village Level Fire Prevention Award semna hun hman niin Pu Thanliana Hauhnar, ACF, Kolasibin lawmthu sawina hun a hmang a ni.

Mualvum 1st IR Bn Headquarters-ah hian Kolasib District Office hrang hrang a thawktuten thing phunna hun an hmang a, zirlai naupangte nen thing tiak 300 phun niin khawtlang hruaitute nen thing phun hnatlang hi naktuk atang hian khaw hrang hrangah an kalpui chhunzawm dawn a ni. Bairabi ‘N’ Village Council chuan Village Level Fire Prevention Award lawmman pakhatna an la a, Bilkhawthlir ‘N’ in lawmman pahnihna lain Bukpui Village Council chuan lawmman pathumna an dawng bawk a ni.