758/2024-2025

Dated Aizawl, the 11th June, 2024: Vawiin khan Chief Minister Pu Lalduhoma chuan Hyve Aizawl City Hall ah Zofa Agency a hawng.

Thusawiin Chief Minister chuan, kan ram economy a that loh avangin unemployment a nasa a, competition examah kan tling hlei thei si lova, hna hnuaihnung zawk thlenga kan dap a ngai a. Thingtlangah hna a vang zual a, hna zawngin khawpuiah thalaite an lut a, an beisei ang an hmu vek si lova. Kan thalai hna zawng te harsatna hriain ram pawnah hna an thawh theih nan Mizoram sawrkar chuan kum 2015 khan Mizoram Private Placement Agencies (Regulation) Act, 2015 a siam ta a. Chu Act ah chuan beyond the boundaries of Mizoram tih hi hmun hnihah ziah lan a ni. Chu dan hmang chuan Agency 27 hnenah phalna pek an ni zui ta a. Kha dan kha kan thuneihna piah lam thil a ni tih hria kan awm lova, kan han kalpui ta a, harsatna kan tawk a, a lo lang fiah ta a ni. Tin, Agency te pawhin kawng dangin dan an lo bawhchhe ve bawk a. Women Commission ten thubuai an thehlut a, nikum lamah mi 29 te man an ni. Bail theih a nih avangin bail an ni a, Investigation tih vek tawh a ni. A hremna lam hi Mizoram sawrkarin prosecution sanction kan tithei lova kumin January thla kan sawrkar laipuiah kan dil ta a. Vawiin thlengin a chhanna kan la nghak mek. Kan han sawrkar veleh khan heng licence te hi kan cancel ta vek a, tumah licence nei an awm tawh lo. Tin, ram danga zofa awm te hi huikhawm tul kan tih avangin Zo Diaspora Cell kan din a, CM office atangin kan function dawn a ni, tiin Agency chungchanga tun hnaia sawrkar hmalakna a tarlang. Heng Agency thua kan harsatna te sutkian theihna awm chhun chu sawrkar laipui atanga dan ang thlapa Licence neih a ni ta a. Ti thei awm se kan duh em em a, vawiinah chutiang ti thei Zofa Agency kan lo nei ta hi ka lawm hle. An tumruhna leh thawhrimna zarah kan thalaiten thlamuang takin ram pawnah hna an zawng thei dawn ta a ni, a ti. Chief Minister hian, Mizo thalaite chu ram danga hna sang leh zahawm tak tak te pawh thawk thei tura inbuatsaih tura fuihin, skill development uar turin a chah a, Taiwan, United Kingdom leh South India lam tea Mizo thalaiten hna an thawh theih dan tur an dap mek thu te pawh a tarlang a ni.

Inkhawm hi Nl PC Zonuntluangin a kaihruaia, Rev K. Rolungmuana'n hunserh hmangin Pi Malsawmdawngkimi, Zofa Agency neitute zinga mi chuan an Agency chanchin tlangpui a sawi a ni.

Zofa Agency hi thianho parukin an din a ni a, MEA License nei tur hian sum leh pai an seng nasa in, document a mamawh tam hle a. Hun engemaw chen an buaipui hnuah kumin January ni 30 khan phalna an hmu a, March thlaah Protector of Emigrants in an rawn tlawh a, branch panga dang dil leh turin thurawn an pe a. Anni hian dil zui nghalin branch panga approval hi an nghak mek a ni. An hnuaia kal te insurance tur pawh cheng nuaih 50 an dah a, kawng him leh dan hnuaiah zel chauh kal an tum a ni.

Anni ang Ministry of External Affairs (MEA) phalna nei Agency hi India hmarchhak bialah pali an awm mek a ni.