757/2024-2025

Aizawl the 11th June, 2024 : Vawiin khan St. Paul’s Higher Secondary School, Tlangnuam, Aizawl chuan HSLC 2024 leh HSSLC 2024-a an zirlai tithate lawmpuina leh chawimawina hun an hmang a, School Education Minister Dr. Vanlalthlana chu Khuallian niin zirlai tithate hnenah ‘Paulians' Proficiency Award 2024’ a hlan a ni.

Paulians' Proficiency Award 2024 hlanna inkhawmah St. Paul’s Higher Secondary School Principal Bro. Kuriyan M.S-in lawmna thu a sawi hnuah Khuallian chuan award hlanna hun a hman zawhah thusawiin St. Paul's HSS atanga zirchhuak ve tho a nih avangin vawiina zirlai tithate chawimawina hun a hmang thei chu lawmawm leh lunglenthlak a ti hle a ni a ti a. He sikula a zirchhungin zirlai piahlamah nunphung dik leh tha nei tura zirtirna tha tak tak a dawn thinte chuan a vawiin hun a siam chhoh a, tun thlengin St. Paul’s HSS chuan zirlai tha leh mi chhuanawm tak takte a chherchhuak zel avangin lawmthu a sawi bawk. Zirlai tithate chuan an taimakna leh tumruhna rah tha an hmu a ni tiin hei hi an bultanna tur chauh a nih avangin an hmalam hun atan theihtawp chhuah zel turin a fuih a ni. St. Paul’s HSS hlawhtlinna leh hmingthatna te chu he sikula zirtirtute an ni tih sawiin Mizoram tana chhenfakawm tur mi tha leh mi thiam te chherchhuahna kawngah theihtawp chhuah zel turin duhsakna a hlan bawk a ni.

Vawiin Paulians' Proficiency Award 2024 hun hmannaah hian zirlai tithate aiawhin HSSLC (Science) 2024 Topper Lalramdina Ralte leh Paulians Alumni Assn. President Dr. Franklin Lalrinngheta ten thu an sawi a. St. Paul’s HSS zirlaiten an thiamthil chi hrang hrang School Vocal Chamber zaipawl te, hnam zai leh lam te, instrumental music te hmangin kalkhawmte tan hun an hmang bawk a ni.