384/2025-2026

Khawzawl, dated 29th April 2025: Vawiin chawhnu dar 1 khan DC Meeting Hall-ah Adviser to CM leh Champhai North bialtu MLA ni bawk Er. H. Ginzalala chuan Khawzawla pisa hotute a hmu a, inkawmna hun leh sawihona a neihpui a ni.

He hunah hian Khawzawl DC Pu K. Vanlalthiana chuan Adviser to CM Er. H. Ginzalala chu a lo lawm a, a hun hlu tak senga Khawzawl a lo tlawh avangin lawmthu a sawi. Pisa hotute hnen atangin PowerPoint presentation ngaihthlak nghal a ni a, Rural Development, Agriculture, Horticulture, Sericulture, Soil & Water Conservation leh BDO lam atangin Khawzawl district-a hmalakna leh hnathawh kal mek chungchang an sawi a ni.

MLA Er. H. Ginzalala chuan PowerPoint presentation hmangin heng khua - Ngaizawl, Rabung, Aiduzawl, Neihdawn, Pamchung - ah project hma lak tumna hrang hrang a sawi lang a, huan te, sangha dil te, ran vulhna te siam theih niin a hriat thu a sawi. MLA chuan Champhai North bial an lo ngai pawimawh a ni tih a hmu thei a, a lawm hle a ni tih a sawi a, Khawzawl district hian hlawhtlinna ropui tak tak a nei a, an fakawm hle a ni tih sawiin thawhhona tha tak neia hma sawn zel turin a fuih bawk a ni. Project rawtna a neih te ngaihtuahna senga hma lak pui turin department te sawm a, thawhhona (convergence) tha tak a awm ngei theih a beisei thu a sawi bawk a ni.

Meeting zawh hian MLA Er. H. Ginzalala chuan Tuipui lui bula Roadside Market cum Recreational Centre atana duan hmun (site) a endik nghal a ni.