383/2025-2026

Lunglei, 2025 Ṭau thla ni 29: Vawiin khan Mizoram sawrkara Persons with Disabilities (PwD) Commissioner Pi Vanlaldiki Sailo hovin Lungleia Deputy Commissioner Office, Civil Hospital Lunglei, Christian Hospital Serkawn, Lunglei Municipal Council Office, Lunglei Government College leh Government Higher Secondary School-ah te vohbikte tana veivah awlsamna ruahman dan endikna (access audit for persons with disabilities) buatsaih a ni.

He access audit-ah hian vohbikte tana awlsam zawka veihvah theihna turin ramp, lift leh vawnban (handrails) te a awm em tih te, an ṭhutna tur zuahsak an ni em tih te, awlsam zawka an hman theih tur inthiarna (toilet) leh lehkha tar (signage) a awm em tih leh vohbikte'n an mamawh an thlenna tur Grievance Redressal Officer ruat an ni em tih te endik a ni.

Hmun hrang hrang an tlawh kualnaah hian PwD Commissioner chuan vohbikte awlsam zawka an veivah theih nan kum 2015 khan Prime Minister chuan Access India Campaign a hawng tih a sawi a. Rights of Persons with Disabilities Act, 2016 hnuaiah vohbikte'n awlsam zawka public office leh damdawi in an dawr theih nan leh zirna inah te awlsam zawka an kai ve theih nan dikna leh chanvo an nei tih sawiin, he an chanvo dik tak hi an chan theih nan ṭan lak tlan a ngai a ni, a ti.

Lungleia Access Audit Team te hi Lunglei District Social Welfare Officer Pu C.L. Joseph, PWD (Building) Executive Engineer Er Zodingliana, DC Office Superintendent Pi Lalsiamthari Bawitlung,  Samagra Shiksha Lungleia Assistant Project Officer Pi Lalhmachhuani leh Junior Engineer pathum te'n an ṭawiawm a ni.

Lunglei District-ah hian District Bawrhsap ruahmannain vohbikte chawi kan nan Project LEAP (Lunglei’s Empowerment for Access and Equity for all Persons) kalpui mek a ni a. Vohbikte tana hma lakna tur hrang hrang ruahman zingah, Lunglei khawpui chhunga public building, hospital, school leh college-ah te access audit hi neih vek tum a ni a. Mamawh hrang hrangte chu concerned department/ministry-ah thlen tur a ni.